خوشحال پاکستان کے عنوان سے دو روزہ اقتصادی کانفرنس 16 اور 17 مئی 2025 ء کو نتھیاگلی، خیبر پختونخوا میں منعقد کی جائے گی جس کا مقصد ممتاز کاروباری رہنماؤں، صنعتی تجارتی ماہرین کو پاکستان کے معاشی چیلنجز پر تفصیلی تبادلہ خیال اور پائیدار ترقی کو آگے بڑھانے کے لئے قابل عمل حکمت عملی تیار کرنے کے لئے اکٹھا کرنا ہے۔
کانفرنس کا انعقاد وفاقی چیمبر اور اقتصادی پالیسیوں کے تھنک ٹینک پراسپر پاکستان کی جانب سے مشترکہ طور پر کیا جائے گا۔
ایف پی سی سی آئی کے نائب صدر عون علی سید نے بزنس ریکارڈر سے گفتگو کرتے ہوئے کہا کہ کانفرنس میں اہم معاشی رکاوٹوں کی نشاندہی، جدید حل تلاش کرنے اور ملک کی اقتصادی صلاحیتوں کو بروئے کار لانے کے لئے مشترکہ شراکت داری کو فروغ دینے پر توجہ مرکوز کی جائے گی۔
عون علی سید نے مزید کہا کہ پروپر پاکستان کانفرنس اقتصادی ترقی اور قومی خوشحالی کے لیے ایک اہم پلیٹ فارم ثابت ہوگی۔ اس ایونٹ کے ذریعے اہم سرکردہ ذہنوں کو ایک جگہ جمع کرکے اور تعاون کو فروغ دے کر پاکستان کے روشن مستقبل کی تعمیر میں مدد ملے گی۔
انہوں نے مزید بتایا کہ کانفرنس کا بنیادی مقصد پاکستان کے اقتصادی منظرنامے اور امکانات پر اعلیٰ سطح بحث کا ایک پلیٹ فارم فراہم کرنا ہے، ساتھ ہی اہم شعبوں اور صنعتوں میں ممکنہ اقتصادی توسیع کے لیے مواقع کی نشاندہی کرنا ہے اس کے علاوہ پاکستان میں جدید کاروباری ماڈلز، تکنیکی ترقیات اور کاروباری منصوبوں کو فروغ دینا بھی شامل ہے۔
اس کے علاوہ، کانفرنس پاکستان کی اقتصادی ترقی میں رکاوٹ بننے والے اہم مسائل کی نشاندہی اور تجزیہ کرنے میں مدد کرے گی، جن میں پالیسی میں خلا، انفرااسٹرکچر کی کمی اور مارکیٹ تک رسائی کے مسائل شامل ہیں، اور صنعت کے رہنماؤں، ماہرین اور پالیسی سازوں کے درمیان تعاون کو فروغ دے گی تاکہ کاروباری اداروں اور حکومت کے لیے عملی حکمت عملی اور پالیسی سفارشات تیار کی جا سکیں۔
انہوں نے مزید کہا کہ کانفرنس کے اختتام پر ایک تفصیلی رپورٹ متوقع ہے جس میں اہم چیلنجز، مواقع اور قابل عمل حکمت عملیوں کو اجاگر کیا جائے گا جو پاکستان کے اقتصادی مستقبل کی رہنمائی کرے گی، جبکہ کاروباری رہنماؤں، ماہرین اور پالیسی سازوں کے درمیان گہرے تعاون کو فروغ دیا جائے گا۔
کاپی رائٹ بزنس ریکارڈر، 2025
Comments
Comments are closed.