ایشیائی ترقیاتی بینک: 2030 تک فوڈ سیکورٹی کی امداد 40 ارب ڈالر تک بڑھانے کا اعلان

ایشیائی ترقیاتی بینک (اے ڈی بی ) نے اتوار کے روز اعلان کیا ہے کہ وہ ایشیا اور بحرالکاہل میں خوراک اور غذائی تحفظ کے لیے اپنی مالی امداد کو 2030 تک بڑھا کر 40 ارب ڈالر کر دے گا، جو کہ پہلے سے وعدہ کیے گئے 14 ارب ڈالر سے کہیں زیادہ ہے۔

بینک کی جانب سے جاری کردہ ایک پریس ریلیز کے مطابق یہ فیصلہ میلان میں منعقدہ آٹھویں سالانہ اے ڈی بی اجلاس کے دوران کیا گیا ہے۔

اجلاس سے خطاب کرتے ہوئے اے ڈی بی کے صدر مساتو کانڈا نے کہا کہ اس میں شامل اضافی 26 ارب ڈالر کا مقصد خطے کو درپیش بڑھتے ہوئے چیلنجز جیسے کہ ماحولیاتی تبدیلی، قدرتی وسائل کی بربادی اور خوراک کی غیر یقینی صورتحال سے نمٹنے میں مدد فراہم کرنا ہے۔

انہوں نے کہا کہ غیر معمولی قحط، سیلاب، شدید گرمی، قدرتی وسائل کی تباہی زرعی پیداوار کو متاثر کر رہی ہے اور ساتھ ہی خوراک کے تحفظ اور دیہی علاقوں کی زندگیوں کو خطرے میں ڈال رہی ہے۔

اس فنڈنگ سے فارمنگ اور پروسیسنگ سے لے کر تقسیم اور کھپت تک پوری فوڈ ویلیو چین میں ایک جامع پروگرام کو مدد ملے گی۔

اس پروگرام کا مقصد متنوع اور غذائیت سے بھرپور خوراک پیدا کرنا، روزگار کے مواقع پیدا کرنا، ماحولیاتی اثرات کو کم کرنا اور زرعی سپلائی چین کو مضبوط بنانا ہے۔

نئے اعلان کردہ 26 ارب ڈالر میں سے 18.5 ارب ڈالر براہ راست ایشیائی ترقیاتی بینک کی مدد سے حکومتوں کو دیے جائیں گے جبکہ 7.5 ارب ڈالر نجی شعبے کی سرمایہ کاری کے لیے جمع کیے جائیں گے۔

مساتو کانڈا نے مزید کہا کہ یہ اضافی امداد ممالک کو بھوک مٹانے، خوراک کے معیار کو بہتر بنانے اور قدرتی ماحول کے تحفظ میں مدد دے گی۔

اس توسیع شدہ امداد سے ممالک کو بھوک کو کم کرنے، خوراک کو بہتر بنانے اور قدرتی ماحول کے تحفظ میں مدد ملے گی۔

ایشیائی ترقیاتی بینک کو توقع ہے کہ 2030 تک 40 ارب ڈالر ز میں سے 27 فیصد سے زائد حصہ نجی شعبے کا ہوگا۔

دنیا کی نصف سے زیادہ غذائی قلت کا شکار آبادی ترقی پذیر ایشیا میں رہتی ہے، جہاں خوراک کے نظام کا 70 فیصد پانی کا استعمال، 50 فیصد قابل رہائش زمین اور 80 فیصد حیاتیاتی تنوع کا نقصان ہوتا ہے۔ اس خطے کے غذائی نظام میں بھی تقریبا 40 فیصد افرادی قوت کام کرتی ہے۔

ایشیائی ترقیاتی بینک کا یہ اقدام ڈیجیٹل ٹیکنالوجی، مٹی کی زرخیزی میں بہتری اور حیاتیاتی تنوع کے تحفظ میں بھی مدد دے گا تاکہ پیداواری صلاحیت اور موسمیاتی مزاحمت کو بڑھایا جا سکے۔

عالمی ماحولیاتی سہولت اور دیگر شراکت داروں کی حمایت سے بینک 150 ملین ڈالر کا نیچرل کیپٹل فنڈ شروع کر رہا ہے تاکہ قدرتی ماحولیاتی نظام کے تحفظ کے لیے زرعی خوراک کے منصوبوں کی حمایت کی جا سکے۔

1966ء میں قائم ہونے والا ایشیائی ترقیاتی بینک ایک کثیر الجہتی ترقیاتی ادارہ ہے جس کے 69 رکن ممالک ہیں جن میں سے 50 کا تعلق ایشیا بحرالکاہل خطے سے ہے۔