پاکستان نے جمعرات کو ایک اہم پیشرفت کے تحت 150 افغان ٹرکوں کو واہگہ بارڈر کے ذریعے بھارت جانے کی اجازت دے دی، جس کا مقصد افغانستان کے ساتھ دوستانہ تعلقات کو برقرار رکھنا ہے۔ اس بات کی تصدیق وزارت خارجہ نے کی۔
یہ فیصلہ افغان سفارت خانے کی جانب سے کیے گئے باضابطہ مطالبے کے جواب میں کیا گیا، جس نے 28 اپریل کو اسلام آباد میں پاکستانی حکام سے ان افغان ٹرکوں کو چھوڑنے کی اپیل کی تھی جو ٹرانزٹ ٹریڈ کی معطلی کے باعث پاکستان کے مختلف ٹرانزٹ پوائنٹس پر پھنسے ہوئے تھے۔
وزارت خارجہ کے مطابق صرف وہ افغان ٹرک بھارت جانے کے مجاز ہوں گے جو 25 اپریل سے پہلے پاکستان میں داخل ہوئے تھے۔ ان 150 افغان ٹرکوں کی تفصیلی فہرست متعلقہ حکام کو بھیج دی گئی ہے تاکہ بارڈر کراسنگ کے عمل کو آسان بنایا جا سکے۔
وزارت خارجہ نے اپنے جوابی خط میں افغان سفارت خانے کو بتایا: ”یہ فیصلہ پاکستان اور افغانستان کے برادرانہ اور خوشگوار تعلقات کا مظہر ہے۔“ مذکورہ ٹرک کئی دنوں سے مختلف چیک پوسٹوں پر افغان-بھارت ٹرانزٹ ٹریڈ پر عائد پابندیوں کے باعث رکے ہوئے تھے۔
وزارت خارجہ نے افغان حکام سے یہ بھی کہا ہے کہ اگر مزید ٹرک پھنسے ہوئے ہیں تو ان کی تفصیلات بھی فراہم کی جائیں تاکہ معاملے پر مزید غور کیا جا سکے۔
Comments
Comments are closed.