چین کا امن و استحکام کے لیے پاکستان کی حمایت کا اعلان

چین نے جمعرات کے روز اس عزم کا اظہار کیا ہے کہ وہ جنوبی ایشیا میں امن و استحکام کے قیام کے لیے پاکستان کی کوششوں کی حمایت کرے گا اور یہ دونوں ممالک کی خواہش ہے۔

وزیر اعظم کے دفتر کی جانب سے جاری بیان کے مطابق یہ بات چین کے سفیر جیانگ زائی دونگ نے وزیرِاعظم شہباز شریف سے وزیرِاعظم ہاؤس میں ملاقات کے دوران کہی۔

ملاقات کے دوران وزیرِاعظم نے چینی صدر شی جن پنگ اور وزیرِاعظم لی چیانگ کے لیے نیک خواہشات کا اظہار کیا اور جنوبی ایشیا کی موجودہ صورتحال میں چین کی مضبوط اور مستقل حمایت پر اظہار تشکر بھی کیا۔

شہباز شریف نے کہا کہ پاکستان نے ہمیشہ ہر قسم کی دہشت گردی کی مذمت کی ہے اور پہلگام واقعے کی قابل اعتماد، غیر جانبدار اور شفاف بین الاقوامی تحقیقات کرانے کی مخلصانہ پیشکش کی حمایت کرنے پر چین کا شکریہ ادا کرتا ہوں۔

وزیر اعظم نے کہا کہ بھارت کا پانی کو بطور ہتھیار استعمال کرنے کا فیصلہ انتہائی افسوسناک ہے کیوں کہ سندھ طاس معاہدہ میں کسی بھی فریق کو یکطرفہ طور پر اپنے وعدوں سے دستبردار ہونے سے متعلق کسی بھی قسم کی کوئی گنجائش نہیں۔

انہوں نے اس بات پر بھی زور دیا کہ مقبوضہ جموں و کشمیر تنازعہ کا پرامن حل ہی جنوبی ایشیا میں دیرپا امن کو یقینی بنانے کا واحد راستہ ہے۔

اتوار کے روز نائب وزیرِاعظم اور وزیرِ خارجہ سینیٹر اسحاق ڈار اور چین کے وزیرِ خارجہ وانگ ای نے علاقائی امن و استحکام کے قیام، باہمی احترام اور افہام و تفہیم کو فروغ دینے، اور یک طرفہ اقدامات کی مخالفت کے لیے مشترکہ عزم کا اعادہ کیا۔

دونوں رہنماؤں نے اس بات پر اتفاق کیا کہ وہ امن، سلامتی، اور پائیدار ترقی کے مشترکہ مقاصد کے حصول کے لیے تمام سطحوں پر قریبی رابطہ اور ہم آہنگی برقرار رکھیں گے۔

پہلگام حملے کے بعد بھارت کو اقوام متحدہ کی سلامتی کونسل (یو این ایس سی) میں دھچکا لگا کیونکہ چین کی حمایت سے پاکستان نے نئی دہلی کی جانب سے حملے کو اپنے حق میں کرنے کی کوششوں کو ناکام بنادیا۔