پاکستان میں غربت کے خاتمے کی کوششیں

غربت کا خاتمہ ان کوششوں، حکمت عملیوں اور پالیسیوں کو کہا جاتا ہے جو غربت کو کم کرنے یا ختم کرنے کے لیے کی جاتی ہیں۔ اس میں غربت میں مبتلا افراد کے لیے زندگی کے معیار، بنیادی ضروریات تک رسائی اور اقتصادی مواقع کو بہتر بنانا شامل ہے۔ غربت کا خاتمہ عموماً معاشرے میں عدم مساوات کو دور کرنے کے لیے بھی ہوتا ہے، جیسے وسائل یا مواقع تک غیر مساوی رسائی۔ یہ دنیا کے اُبھرتے ہوئے ممالک کے لیے ترقی کا ایک مقصد سمجھا جاتا ہے اور عالمی سیاست اور اقتصادی پیشرفت میں ان کی حیثیت کو تسلیم کیا جاتا ہے۔

کیا پاکستان کی غربت کے خاتمے کے لیے کوئی حکمت عملی، پالیسیز اور کوششیں ترجیحی فہرست میں شامل ہیں؟ اس کا جواب زمین پر موجود حقیقت میں چھپا ہے۔ ایک طرف ملک کے اہم مالیاتی کارکردگی کے اشاریوں میں استحکام کا جشن منایا جا رہا ہے، وہیں ملک کے غریب عوام کے لیے خبریں پریشان کن ہیں۔ آئی ایم ایف نے پاکستان کی اقتصادی نمو میں 2.6 فیصد کی کمی کردی ہے۔

اسی دوران ورلڈ بینک کا تخمینہ ہے کہ رواں سال 1.9 ملین مزید افراد غربت کی لکیر سے نیچے جا سکتے ہیں۔ یہ تعداد اس وقت 42 فیصد سے زائد آبادی میں شامل ہو جائے گی جو پہلے ہی غربت کی لکیر سے نیچے زندگی گزار رہی ہے — جو کہ ملک کے معاشی و سماجی ڈھانچے کو برقرار رکھنے کے لیے مناسب نہیں ہے۔

ورلڈ اکنامک آؤٹ لک نے اس بات پر زور دیا ہے کہ پاکستان کی متوقع اقتصادی نمو غربت کو کم کرنے کے لیے کافی نہیں ہے، حالانکہ معیشت کے استحکام اور افراط زر میں کمی میں کچھ مثبت رجحانات دیکھے گئے ہیں۔ ماہرین اقتصادیات کا ماننا ہے کہ معیشت کو غربت کم کرنے اور 2 سے3 ملین نئے مزدوروں کے لیے روزگار پیدا کرنے کے لیے ہر سال 6 سے8 فیصد کی شرح سے بڑھنا ضروری ہے۔ ماہرین اقتصادیات کا یہ اندازہ کہ 6 سے 8 فیصد کی شرح نمو غربت کو شکست دینے کے لیے حقیقت پسندانہ ہے، اس بات کی عکاسی کرتا ہے کہ پاکستان کے ہمسایہ ممالک جو 6 فیصد سے زائد کی شرح نمو برقرار رکھے ہوئے ہیں، وہ غربت کے خاتمے میں کامیاب ہورہے ہیں۔

جنوبی ایشیا کا خطہ، جو دنیا کی 25 فیصد آبادی کو اپنے اندر سموئے ہوئے ہے اور جس کی تعداد 2 ارب ہے، عالمی غریبوں کا تقریباً 30 فیصد حصہ رکھتا ہے۔ اسی دوران، جنوبی ایشیا دنیا کے نقشے پر ایک تیز ترین بڑھتی ہوئی معیشت کے طور پر ابھرا ہے، جس کی جی ڈی پی نمو 6 فیصد سے زائد ہے اور افراط زر اور بیروزگاری بالترتیب 7.2 فیصد اور 7 فیصد تک محدود ہیں۔ خطے کے بیشتر ممالک 6 فیصد سے زائد کی شرح نمو ریکارڈ کررہے ہیں اور غربت کے خلاف جنگ میں کامیاب ہو رہے ہیں اور ہر سال زیادہ سے زیادہ لوگ غربت سے باہر نکل رہے ہیں۔

اسٹیٹ بینک آف انڈیا (ایس بی آئی) کی ایک رپورٹ کے مطابق سال 2024 میں ہندوستان میں غربت کی شرح 5 فیصد سے کم ہو گئی، دیہی غربت 4.86 فیصد اور شہری غربت 4.09 فیصد رہی۔ یہ گزشتہ سالوں کے مقابلے میں نمایاں کمی کی نشاندہی کرتا ہے، مالی سال 23 میں دیہی غربت 7.2 فیصد اور مالی سال 12 میں 25.7 فیصد سے کم ہوگئی ہے اور شہری غربت مالی سال 23 میں 4.6 فیصد اور مالی سال 12 میں 13.7 فیصد سے کم ہوگئی ہے۔

عالمی بینک کے مطابق سنہ 2000 کے بعد سے بنگلہ دیش کے 33 ملین سے زائد افراد کو غربت سے نکالا گیا ہے۔ 2000 کی دہائی کے اوائل سے تیز اقتصادی ترقی نے فی کس آمدنی میں غیر معمولی اضافہ کیا ہے۔ 2010 سے 2020 کے درمیان بنگلہ دیش کی فی کس آمدنی تقریباً تین گنا بڑھ کر 700 ڈالر سے 2,068 ڈالر تک پہنچ گئی، جو جنوبی ایشیا میں سب سے زیادہ جی ڈی پی فی کس ہے اور اس نے بنگلہ دیش کو درمیانی آمدنی والے معیشتوں کی صف میں شامل کرلیا ہے۔

ویتنام نے غربت کو کم کرنے میں نمایاں ترقی کی ہے، اور حالیہ سالوں میں غربت کی شرح میں مسلسل کمی آئی ہے۔ 2023 میں، ویتنام کی غربت کی شرح 3.4 فیصد رہی۔

ان ممالک کی غربت پر قابو پانے میں جو چیز مشترک ہے وہ کئی سالوں پر محیط 6 فیصد سے زائد کی مسلسل اقتصادی ترقی ہے، جسے اقتصادی اصلاحات، سیاسی استحکام، قانون کی حکمرانی اور کاروبار کے لیے سازگار ماحول نے سہارا دیا ہے۔

سوال یہ پیدا ہوتا ہے کہ پاکستان غربت کے خاتمے میں اپنے ہمسایہ ممالک کے مقابلے میں کہاں کھڑا ہے؟ جواب یہ ہے کہ بہت پیچھے، اور حد سے زیادہ پیچھے۔ اس کی واضح وجوہات ہیں۔ سب سے بڑی وجہ یہ ہے کہ غربت کا خاتمہ ریاست کی معاشی ترجیحات اور منظرنامے میں کسی ہنگامی معاملے کے طور پر شامل ہی نہیں، حالانکہ وہ عالمی ادارے جو بھوک کے معنی جانتے ہیں، خطرے کی گھنٹیاں بجا رہے ہیں اور انتباہ جاری کررہے ہیں۔

پاکستان میں غذائی عدم تحفظ کا خطرہ ایک تشویشناک شکل اختیار کر چکا ہے۔ ورلڈ بینک کی حالیہ وارننگ کہ رواں مالی سال کے دوران تقریباً ایک کروڑ پاکستانی شدید غذائی عدم تحفظ کا شکار ہوسکتے ہیں، پالیسی سازوں اور عوام دونوں کے لیے ایک الارم ہے۔ 2.7 فیصد کی سست رفتار اقتصادی ترقی کے ساتھ ساتھ موسمیاتی تبدیلیوں کے مسلسل اثرات نے زراعت، خاص طور پر چاول اور مکئی جیسی بڑی فصلوں کو نقصان پہنچایا ہے، جو غیر متوقع موسمی حالات اور پانی کی قلت کا شکار ہو کر دیہی زندگیوں کو متاثر کر رہی ہیں اور قومی غذائی ذخائر میں کمی لارہی ہیں۔

ایشیائی ترقیاتی بینک (اے ڈی بی) کے مطابق پاکستان کو ہر سال موسمیاتی آفات کے باعث اوسطاً 2 ارب ڈالر سے زائد کا نقصان برداشت کرنا پڑتا ہے، جو پہلے سے بلند سطح پر موجود غربت کو مزید بڑھا رہا ہے۔ ایک آزاد تجزیے کے مطابق ترقیاتی فنڈز کے مؤثر استعمال میں پاکستان کی ناکامی ملک کی اقتصادی ترقی اور موسمیاتی لچک بڑھانے کی کوششوں میں شدید رکاوٹ بن رہی ہے۔ ہر سال 2 ارب ڈالر سے زائد کے ترقیاتی فنڈز خرچ نہ ہونے کے باعث ملک کی فنڈز جذب کرنے کی صلاحیت ایک سنگین رکاوٹ بن چکی ہے۔ قدیم طریقہ کار میں اصلاحات کرنے کے بجائے،اب یہ مسئلہ قابلِ سرمایہ کاری منصوبوں“ کی عدم موجودگی پر ڈال دیا گیا ہے۔ پاکستان میں ترقیاتی فنڈز کے کم خرچ ہونے اور منصوبوں میں تاخیر سے متعلق کئی دستاویزات موجود ہیں۔ اکنامک افیئرز ڈویژن کے اعداد و شمار کے مطابق، غیر استعمال شدہ غیر ملکی امدادی فنڈز 2017-2018 میں تقریباً 1.2 ارب ڈالر سے بڑھ کر 2022-2023 میں 2.1 ارب ڈالر تک پہنچ گئے۔

اس وقت 42 فیصد آبادی غربت کی لکیر سے نیچے زندگی بسر کررہی ہے اور ملک کے معاشی و سماجی ڈھانچے کو شدید خطرے میں ڈال رہی ہے، ایک ایسا معاملہ ہے جس پر ریاست کی فوری توجہ کی ضرورت ہے۔ یہ کہنے کی ضرورت نہیں کہ ایک قوم اپنی عوام سے بنتی ہے اور 42 فیصد عوام ایک ایسا بڑا حصہ ہے جس کی اہمیت نظر انداز نہیں کی جا سکتی۔

کاپی رائٹ بزنس ریکارڈر، 2025