زرعی اجناس: سیریل ایسوسی ایشن کا وفد برآمدی مواقع تلاش کرنے کیلئے بنگلہ دیش روانہ

سیریل ایسوسی ایشن آف پاکستان (سی اے پی) کا 14 رکنی وفد ہفتہ کو 7 روزہ دورے پر بنگلہ دیش روانہ ہوگا جس کا مقصد چاول، مکئی اور مصالحہ جات جیسی زرعی اجناس میں برآمدی مواقع تلاش کرنا ہے۔

دونوں ممالک کے درمیان تجارتی تعلقات میں نمایاں بہتری کے بعد مکئی کے تاجروں کا یہ اپنی نوعیت کا پہلا دورہ ہے۔

ٹریڈ ڈیولپمنٹ اتھارٹی آف پاکستان (ٹڈاپ) کے تعاون سے ہونے والے دورے کے 14 رکنی وفد کی سربراہی سیریل ایسوسی ایشن آف پاکستان کے بانی چیئرمین مزمل رؤف چیپل کر رہے ہیں جہاں وہ مختلف تجارتی اداروں، حکومتی عہدیداروں اور کاروباری رہنماؤں سے ملاقاتیں کریں گے تاکہ مارکیٹ کی طلب اور ممکنہ شراکت داری کا جائزہ لیا جاسکے۔

مزمل رؤف چیپل کے مطابق بنگلہ دیش پاکستانی اناج اور غذائی مصنوعات کے لیے ایک امید افزا منڈی پیش کرتا ہے اور حالیہ سیاسی تبدیلیوں کے باعث دونوں ممالک کے تعلقات مزید مضبوط ہوئے ہیں جس کے تحت پاکستان نے رواں سال کے اوائل میں حکومت سے حکومت کی سطح پر 50 ہزار ٹن چاول برآمد کیے۔

انہوں نے کہا کہ بنگلہ دیش نے پاکستان سے اضافی اشیائے خورونوش درآمد کرنے میں دلچسپی ظاہر کی ہے لہذا وفد برآمدی مواقع تلاش کرنے کیلئے دورہ کر رہا ہے۔

چیپل نے دورے میں سہولت فراہم کرنے پر ٹڈاپ کی تعریف کی اور پاکستان کی برآمدات میں اضافے کے لئے اس طرح کے اقدامات کی اہمیت پر زور دیا۔ انہوں نے نائب وزیر اعظم اسحاق ڈار کی کاوشوں کو بھی سراہا جن کی ذاتی شمولیت نے اس دورے کو ممکن بنانے میں اہم کردار ادا کیا۔ مزید برآں انہوں نے وفد کو مکمل تعاون فراہم کرنے پر بنگلہ دیش میں پاکستانی سفارت خانے کی تعریف کی۔

انہوں نے بتایا کہ دورے کے دوران وفد بنگلہ دیش کے ایکسپورٹ پروموشن بیورو، ڈھاکہ چیمبر آف کامرس اینڈ انڈسٹری، پاکستان بنگلہ دیش بزنس فورم، فیڈریشن آف بنگلہ دیش چیمبرز آف کامرس اینڈ انڈسٹری (ایف بی سی سی آئی) اور فیڈ انڈسٹری ایسوسی ایشن آف بنگلہ دیش کے عہدیداروں سے ملاقات کرے گا۔

چیپل نے امید ظاہر کی کہ اس دورے سے پاکستان اور بنگلہ دیش کے درمیان تجارت اور تعاون کے نئے راستے کھلیں گے جس سے پاکستانی برآمد کنندگان کو زرمبادلہ کی آمدنی میں اضافے کے ذریعے معیشت میں زیادہ اہم کردار ادا کرنے میں مدد ملے گی۔

کاپی رائٹ بزنس ریکارڈر، 2025