وفاقی وزیر خزانہ و محصولات محمد اورنگزیب نے منگل کو جی 24 کے وزرائے خزانہ اور سینٹرل بینک کے گورنرز کے اجلاس سے خطاب کرتے ہوئے ملک میں میکرو اکنامک استحکام کے حصول کی جانب پیش رفت پر روشنی ڈالی۔
یہ ملاقات واشنگٹن میں بین الاقوامی مالیاتی فنڈ (آئی ایم ایف) اور ورلڈ بینک گروپ کے 2025 کے موسم بہار کے اجلاس کے موقع پر ہوئی۔
جی 24 کے دوسرے وائس چیئرمین کی حیثیت سے اپنے کردار میں اظہار خیال کرتے ہوئے محمد اورنگ زیب نے پاکستان کے بینکاری نظام کی لچک اور اہم ڈھانچہ جاتی اصلاحات کے تسلسل کو ملک کی معاشی بحالی کی بنیاد قرار دیا ہے۔
انہوں نے کہا کہ ان کوششوں نے پاکستان کے معاشی منظرنامے کو تقویت پہنچائی اور ملک کو اس قابل بنایا ہے کہ وہ بیرونی جھٹکوں اور بدلتے ہوئے عالمی حالات کا بہتر انداز میں مقابلہ کر سکے۔
وزیر خزانہ نے ترقی پذیر معیشتوں کو درپیش وسیع تر عالمی چیلنجز پر روشنی ڈالی جن میں جغرافیائی سیاسی کشیدگی، بڑھتی ہوئی تحفظ پسندی اور تجارتی تقسیم شامل ہیں۔ انہوں نے ان خطرات سے تحفظ فراہم کرنے اور جامع ترقی کو یقینی بنانے کے لئے مستقل اصلاحات کی رفتار پر زور دیا۔
محمد اورنگ زیب نے علاقائی تجارتی راہداریوں کی توسیع اور رابطوں کو بڑھانے کی بھی وکالت کی اور انہیں سرمایہ کاری اور تجارتی بہاؤ کو فروغ دینے کے لئے ضروری عوامل قرار دیا۔
انہوں نے جنوب جنوب تعاون کے کردار پر زور دیتے ہوئے ترقی پذیر ممالک کے درمیان مشترکہ اقتصادی چیلنجز سے نمٹنے کے لئے مضبوط مالی اور تکنیکی تعاون پر زور دیا۔
Comments
Comments are closed.