ٹریڈ ڈیولپمنٹ اتھارٹی آف پاکستان (ٹڈاپ) کی جانب سے ہیلتھ، انجینئرنگ اور منرلز شو کا انعقاد کیا جارہا ہے جو سال کی سب سے بڑی نمائش ہے۔ تین روزہ نمائش میں پاکستان کی صحت، انجینئرنگ اور معدنیات کی صنعتوں کی ترقی اور عالمی سطح پر تعاون کو فروغ دینے پر توجہ دی گئی ہے۔
ٹریڈ ڈیولپمنٹ اتھارٹی آف پاکستان (ٹڈاپ) کے زیر اہتمام ہیلتھ، انجینئرنگ اور منرلز شو (ایچ ای ایم ایس) 2025 کا آغاز لاہور ایکسپو سینٹر میں شاندار افتتاحی تقریب کے ساتھ ہوا۔ افتتاحی تقریب کے مہمان خصوصی وزیرصنعت و تجارت پنجاب چودھری شافع حسین تھے۔ اس موقع پر چیف ایگزیکٹو ٹڈاپ فیض احمد، سیکریٹری شہریار تاج، لاہور چیمبر کے صدر ابوذر شاد اور ایف پی سی سی آئی کے ریجنل چیئرمین و نائب صدر زین افتخار چودھری بھی موجود تھے۔
تین روزہ ایونٹ پاکستان کے انجینئرنگ، معدنیات اور صحت کے شعبوں میں بین الاقوامی تجارتی شراکت داریوں کو فروغ دینے کے عزم کی ایک اہم مثال ہے۔ اس ایونٹ کا مقصد افریقہ، یورپ، مشرق وسطیٰ، چین اور وسطی ایشیائی جمہوریہ (سی اے آرز) سے خریداروں کو متوجہ کرنا ہے، تاکہ غیر ملکی کاروباری ادارے پاکستان کی متنوع مصنوعات اور صلاحیتوں کا فائدہ اٹھا سکیں۔
ہیلتھ، انجینئرنگ اور منرلز شو 2025 میں 70 سے زائد ممالک کے 900 سے زائد غیر ملکی خریدار اور درآمد کنندگان شرکت کررہے ہیں جو تقریباً 200 پاکستانی نمائش کنندگان کے ساتھ ملاقات کریں گے۔ شریک ممالک میں چین، نائجیریا، سینیگال، ایتھوپیا، روانڈا، سری لنکا، قازقستان، کینیا، ترکی، تاجکستان، ملائیشیا، برطانیہ، اسپین، انڈونیشیا، نیدرلینڈز، کوریا، فلپائن، روس اور ویتنام شامل ہیں۔
نمائش میں 20 سے زائد شعبوں کی مصنوعات پیش کی جارہی ہیں جن میں دواسازی، سرجیکل آلات، زرعی مشینری، تعمیراتی آلات، آٹو پارٹس، کھیلوں کا سامان، موبائل ڈیوائسز، کیمیکلز، برقی آلات، کاسمیٹکس، کٹلری، ہنڈی کرافٹس اور قیمتی پتھروں و زیورات شامل ہیں۔
کاپی رائٹ بزنس ریکارڈر، 2025
Comments
Comments are closed.