اینگرو پاورجن قادرپور لمیٹڈ کی سہ ماہی کارکردگی

اینگرو پاورجن قادر پور لمیٹڈ (ای پی کیو ایل) نے 2025 کی پہلی سہ ماہی میں ملا جلا مالیاتی کارکردگی کا مظاہرہ کیا ہے، جہاں فی حصص آمدنی سالانہ 34 فیصد کم رہی، اگرچہ گزشتہ سہ ماہی میں لیٹ پیمنٹ سرچارج (ایل پی ایس) کے لیے کی گئی پروویژننگ کی وجہ سے سہ ماہی بنیاد پر کچھ بہتری دیکھی گئی۔ کمپنی نے اس عرصے کے دوران فی حصص 7.50 روپے کا ریکارڈ عبوری ڈیویڈنڈ دینے کا اعلان کیا، جو ایک ترمیم شدہ معاہدے کے تحت واجب الادا رقوم کی طویل انتظار کے بعد وصولی کی بدولت ممکن ہوا۔

کمپنی کی فروخت میں اضافہ نہ ہونے کے برابر رہا، تاہم سال 25 کی پہلی سہ ماہی میں مجموعی منافع گزشتہ سہ ماہی کے مقابلے میں 55 فیصد اور سالانہ 2 فیصد بڑھا، جس کی وجہ مارچ میں بہتر بجلی پیداوار اور آپریشن و مینٹیننس (او اینڈ ایم) اخراجات میں بہتری رہی۔ تاہم، فنانس آمدنی میں سالانہ 89 فیصد اور سہ ماہی بنیاد پر 105 فیصد کی نمایاں کمی دیکھی گئی کیونکہ بقایا جات کم ہوئے اور ایل پی ایس معاف کر دیا گیا۔ اس کے باوجود، اینگرو پاورجن قادر پور لمیٹڈ کی خالص آمدنی میں کمی آئی، جس کی وجہ انتظامی اخراجات میں اضافہ رہا۔

اگر سال 2024 کو دیکھا جائے تو کمپنی کی خالص فروخت 13.2 ارب روپے رہی، جو گزشتہ سال کے برابر تھی، جبکہ بعد از ٹیکس منافع میں سالانہ 15 فیصد کی کمی واقع ہوئی۔ آمدنی میں کمی کی بنیادی وجہ دیگر اخراجات میں زبردست اضافہ رہا، جو 13 گنا بڑھ گئے۔ اس سال بجلی کی کل پیداوار 847 گیگا واٹ آور رہی، جس کا لوڈ فیکٹر 45 فیصد تھا، جو 2023 میں 46 فیصد سے معمولی کم ہے۔ سب سے اہم پیش رفت پاور پرچیز ایگریمنٹ (پی پی اے) میں ترمیم تھی، جس کے تحت نومبر 2024 سے اینگرو پاورجن قادر پور لمیٹڈ کا ماڈل ”ٹیک اینڈ پے“ میں تبدیل کر دیا جائے گا۔ نئے معاہدے کے تحت کم از کم بل شدہ کپیسٹی فیکٹر کو 100 فیصد سے کم کر کے 35 فیصد کر دیا گیا، اور اس کے بدلے میں ایل پی ایس کی واجب الادا رقوم معاف کر دی گئیں۔

اس کے علاوہ، نیپرا نے اینگرو پاورجن قادر پور لمیٹڈ کے جنریشن لائسنس میں ترمیم کی منظوری دی، جس کے تحت کمپنی اب پیٹرولیم ایکسپلوریشن لمیٹڈ (پی ای ایل) کے زیرِ انتظام بدر گیس فیلڈ سے گیس حاصل کر سکے گی۔ اس اضافے کے نتیجے میں اینگرو پاورجن قادر پور لمیٹڈ کی میرٹ آرڈر میں درجہ بندی بہتر ہونے کی توقع ہے۔ دریں اثنا، کمپنی کی انتظامیہ مزید ایندھن کے ذرائع میں تنوع لانے پر غور کر رہی ہے۔

اگرچہ ”ٹیک اینڈ پے“ نظام کی طرف منتقلی سے طویل مدتی آمدنی اور کمپنی کی قدر پر منفی اثرات کے خدشات موجود ہیں، تاہم اینگرو پاورجن قادر پور لمیٹڈ کی بہتر مالی وصولیوں کی پوزیشن اور بھاری ڈیویڈنڈ کی ادائیگی نے سرمایہ کاروں کو قلیل مدتی سہارا فراہم کیا۔ اس کے باوجود، کچھ خطرات برقرار ہیں، جن میں درآمدی کوئلے کی قیمتوں میں کمی اور گیس کی اوسط لاگت (واکوگ) کا اطلاق شامل ہے، جو اینگرو پاورجن قادر پور لمیٹڈ کی مسابقت کو چیلنج کر سکتے ہیں۔