وزیر خزانہ نے کے الیکٹرک کے زیر التوا مسائل کے حل کیلئے اجلاس آج طلب کرلیا

باخبر ذرائع نے بزنس ریکارڈر کو بتایا کہ وزیر خزانہ سینیٹر محمد اورنگزیب نے جمعرات، 10 اپریل کو کے-الیکٹرک سے متعلق حل طلب امور کا جائزہ لینے کے لیے ایک اور اجلاس طلب کر لیا ہے۔ یہ مسائل اسپیشل انویسٹمنٹ فسیلیٹیشن کونسل (ایس آئی ایف سی) اور پاور ٹاسک فورس کی زیرِ غور ہیں۔

ایس آئی ایف سی سیکریٹریٹ کی جانب سے جاری کردہ نوٹس کے مطابق اعلیٰ سطحی پینل درج ذیل نکات پر تازہ پیش رفت پر بات کرے گا:
(i) بجلی کی پیداوار کا ٹیرف؛
(ii) ترسیل، تقسیم اور سپلائی کا ٹیرف؛
(iii) کے-الیکٹرک کے واجب الادا 68 ارب روپے کے کلیمز (جو اب بڑھ کر 76 ارب روپے ہو چکے ہیں)؛
(iv) سعودی کمپنی ”ال-جمیح“ اور پاکستانی کمپنی ”ایم/ایس ایشیا پیک“ (شہریار چشتی) کے درمیان شیئر ہولڈنگ تنازع؛
(v) اشتر اوصاف کے زیرِ نگرانی حکومتی اداروں کے ساتھ ثالثی معاہدہ۔

اجلاس میں وفاقی وزیر برائے توانائی سردار اویس لغاری، وزیراعظم کے مشیر برائے نجکاری محمد علی، پاور ٹاسک فورس کے نیشنل کوآرڈینیٹر لیفٹیننٹ جنرل ظفر اقبال، ایس آئی ایف سیکے نیشنل کوآرڈینیٹر لیفٹیننٹ جنرل سرفراز احمد، سیکریٹری خزانہ، سیکریٹری پاور، سیکریٹری قانون، چیف سیکریٹری سندھ (زوم کے ذریعے)، چیئرمین ایس ای سی پی، چیئرمین نیپرا اور متعلقہ ممبران، ایس آئی ایف سی کے ڈائریکٹر جنرل، چیف آف اسٹاف، جے ایس (ملٹری) پراجیکٹس، اور ڈائریکٹر (ملٹری) پاور شرکت کریں گے۔

ذرائع کے مطابق، جنوری 2025 میں ہونے والے گزشتہ اجلاس میں متعلقہ اداروں کو تمام زیر التوا مسائل ایک ماہ میں حل کرنے کی ہدایت کی گئی تھی، تاہم توقعات کے مطابق پیش رفت نہیں ہو سکی۔

آئندہ اجلاس میں ان رکاوٹوں پر بات کی جائے گی جو مسائل کے حل میں حائل ہیں۔ سعودی کمپنی ال-جمیح، جسے ریاض کی مکمل حمایت حاصل ہے، ان معاملات کو مستقل بنیادوں پر سرکاری سطح پر اٹھاتی رہی ہے۔

شیئرہولڈنگ کے تنازع میں دونوں فریق بااثر ہیں، اور طاقتور حلقوں کی حمایت کی وجہ سے ایس ای سی پی نے کیو بلاک کی باضابطہ ہدایت کے بغیر کوئی اقدام نہیں اٹھایا۔

ذرائع کا کہنا ہے کہ سعودی سرمایہ کاروں کو یقین دہانی کروائی گئی ہے کہ تمام زیر التوا معاملات رواں ماہ کے اختتام تک حل کر لیے جائیں گے۔ ٹیرف سے متعلق فیصلوں کی اجرا کا معاملہ بھی آج کیو بلاک میں ہونے والے اجلاس میں زیر غور آئے گا۔

وفاقی حکومت پہلے ہی کے-الیکٹرک اور حکومت سندھ کے درمیان اربوں روپے کے واجبات کی تصفیے کے لیے ثالثی کا طریقہ کار منظور کر چکی ہے، جس کا تعلق سی پی پی اے-جی اور این ٹی ڈی سی کو واجب الادا رقم سے ہے۔

کاپی رائٹ بزنس ریکارڈر، 2025