سونا مزید مہنگا، قیمتیں تاریخ کی نئی بلند ترین سطح پر جاپہنچیں

سونے کی قیمتوں میں اضافے کا سلسلہ تھمنے کا نام نہیں لے رہا جس کے نتیجے میں سونے کی قیمتیں آئے روز نئے ریکارڈ بنارہی ہیں۔

عالمی بلین مارکیٹ میں سونا 12 ڈالر کے اضافے سے پہلی بار 3050 ڈالر فی اونس کا ہوگیا۔

بین الاقوامی مارکیٹ میں سونے کے نرخ میں اضافے کے باعث مقامی سطح پر بھی فی تولہ سونا ایک ہزار 800 روپے کے نمایاں اضافے سے ملکی تاریخ میں پہلی بار 3 لاکھ 20 ہزار 800 روپے کی بلند ترین سطح پر جاپہنچا۔

اسی طرح دس گرام سونے کی قیمت ایک ہزار 543 روپے کے بڑے اضافے سے 2 لاکھ 75 ہزار 34 روپے ہوگئی۔

یاد رہے کہ بدھ کو سونے کی فی تولہ قیمت 1650 روپے کے بڑے اضافے سے 3 لاکھ 19 ہزار روپے پر جاپہنچی تھی ۔

دریں اثنا چاندی فی تولہ قیمت 31 روپے کی کمی سے 3 ہزار 524 روپے ہوگئی تھی۔