ایران، روس اور چین کی مشترکہ فوجی مشقیں، پاکستان مبصر کی حیثیت سے شرکت کرے گا

یرانی میڈیا نے رپورٹ کیا کہ ایران، روس اور چین کی بحری افواج رواں ہفتے ایران کے ساحل پر فوجی مشقیں کریں گی جس کا مقصد باہمی تعاون کو فروغ دینا ہے۔

تینوں ممالک، جو امریکی بالادستی کا مقابلہ کرنے کی مشترکہ خواہش رکھتے ہیں، نے حالیہ برسوں میں خطے میں اسی طرح کی مشقیں کی ہیں۔

خبر رساں ادارے تسنیم کے مطابق یہ مشقیں منگل سے خلیج عمان کے جنوب مشرقی علاقے میں واقع چابہار کی بندرگاہ پر شروع ہوں گی۔ تسنیم کے مطابق، ”چینی اور روسی بحری افواج کے جنگی جہازوں اور جنگی اور معاون جہازوں کے ساتھ ساتھ ایرانی فوج کی بحری افواج اور پاسداران انقلاب کے جنگی جہازوں کی شرکت متوقع ہے“ جو ایرانی فوج کا نظریاتی بازو ہے۔

تسنیم نے کہا کہ یہ مشقیں شمالی بحر ہند میں ہوں گی اور ان کا مقصد ”خطے میں سلامتی کو مضبوط بنانا اور شریک ممالک کے درمیان کثیر الجہتی تعاون کو بڑھانا“ ہے۔

آذربائیجان، جنوبی افریقہ، عمان، قازقستان، پاکستان، قطر، عراق، متحدہ عرب امارات اور سری لنکا مبصرین کی حیثیت سے شرکت کریں گے۔

بیجنگ کی وزارت دفاع نے وی چیٹ سوشل میڈیا نیٹ ورک پر کہا کہ چین ایک ڈسٹرائر اور ایک سپلائی جہاز تعینات کرے گا۔ ایرانی فوج نے فروری میں اسی علاقے میں مشقیں کی تھیں تاکہ کسی بھی خطرے کے خلاف دفاعی صلاحیتوں کو مضبوط کیا جا سکے۔