ایک پنشن کی شرط کن ملازمین پر لاگو ہوگی؟ وزارت خزانہ نے وضاحت کردی

وزارت خزانہ نے وضاحت کی ہے کہ ایک پنشن کے انتخاب کی شرط ان سرکاری ملازمین پر لاگو ہوگی جو یکم جنوری 2025 یا اس کے بعد دوبارہ ملازمت حاصل کریں گے۔

وزارت خزانہ کے مطابق مختلف حلقوں سے وضاحت کیلئے متعدد سوالات اٹھائے گئے ہیں، ان سوالات کے جوابات معلومات اور ضروری عملدرآمد کے لیے فراہم کیے گئے ہیں۔

سوال یہ ہے کہ کیا ایک پنشن منتخب کرنے کی شرط ان افراد پر بھی لاگو ہوگی جو مذکورہ آفس میمورنڈم (او ایم) کے اجرا سے قبل ایک سے زائد پنشن حاصل کر رہے تھے یا نہیں؟

وزارت خزانہ نے وضاحت کرتے ہوئے کہا کہ یہ فیصلہ وفاقی پنشن پر لاگو نہیں ہوتا اور ان افراد پر بھی لاگو نہیں ہوگا جو مذکورہ آفس میمورنڈم (او ایم) کے اجرا سے قبل ایک سے زائد پنشن حاصل کر رہے تھے۔

تاہم یکم جنوری 2025 کو یا اس کے بعد دوبارہ ملازمت حاصل کرنے والے سرکاری ملازمین پر ایک پنشن کا انتخاب کرنے کی شرط لاگو ہوگی۔

وزارتِ خزانہ نے وضاحت کی کہ فیملی پنشن کا تعین اصل وصول کی جانے والی پنشن کی بنیاد پر کیا جائے گا، نہ کہ بنیادی رقم پر۔ اس حساب سے طے شدہ پنشن آئندہ اضافوں کے لیے بنیادی پنشن بن جائے گی۔

کاپی رائٹ بزنس ریکارڈر، 2025