ڈالر کے مقابلے میں روپے کی قدر میں معمولی کمی

انٹر بینک مارکیٹ میں پیر کے روز امریکی ڈالر کے مقابلے میں پاکستانی روپے کی قدر میں 0.03 فیصد کی کمی ریکارڈ کی گئی۔

کاروبار کے اختتام پر روپیہ 9 پیسے کی کمی کے ساتھ 279.66 روپے پر بند ہوا۔

گزشتہ ہفتے کے دوران انٹر بینک مارکیٹ میں امریکی ڈالر کے مقابلے میں روپے کی قدر میں 0.36 روپے یا 0.13 فیصد کی کمی ریکارڈ کی گئی تھی۔

اسٹیٹ بینک آف پاکستان (ایس بی پی) کے مطابق مقامی کرنسی 279.57 روپے پر بند ہوئی جو گزشتہ ہفتے 279.21 روپے پر بند ہوئی تھی۔

بین الاقوامی مالیاتی فنڈ (آئی ایم ایف) کا ایک وفد مارچ کے وسط میں اسلام آباد پہنچے گا جہاں وہ پاکستان کے توسیعی فنڈ سہولت (ای ایف ایف) پروگرام کے تحت پہلے جائزے پر بات چیت کرے گا۔

بین الاقوامی سطح پر امریکی ڈالر 149.36 ین پر بند ہوا، جس نے گزشتہ ہفتے 2 فیصد کمی کے ساتھ 148.65 پر چارٹ سپورٹ کو خطرے میں ڈال دیا۔

یورو، اسٹرلنگ اور سوئس فرانک میں کمی کے ساتھ امریکی ڈالر انڈیکس 0.3 فیصد کمی کے ساتھ 106.210 پر آگیا۔

جمعے کے روز جاری ہونے والے اعداد و شمار کے مطابق درآمدات پر محصولات اور وفاقی اخراجات میں کٹوتی کے بڑھتے ہوئے خدشات کی وجہ سے فروری میں امریکی کاروباری سرگرمیاں تقریبا رک گئیں۔ اس کے علاوہ اعداد و شمار سے پتہ چلتا ہے کہ امریکی صارفین کا اعتماد توقع سے کہیں زیادہ گر کر 15 ماہ کی کم ترین سطح پر آ گیا ہے اور افراط زر کی توقعات میں اضافہ ہوا ہے۔

کردستان کے آئل فیلڈز سے برآمدات کی بحالی کے امکانات کی وجہ سے پیر کے روز ابتدائی کاروبار میں تیل کی قیمتوں میں کمی واقع ہوئی، جس سے گزشتہ ہفتے کے مقابلے میں نقصانات میں اضافہ ہوا، جبکہ سرمایہ کار یوکرین کے خلاف روس کی جنگ کے خاتمے کے لئے بات چیت پر تفصیل کا انتظار کر رہے تھے۔

مقامی وقت کے مطابق صبح 113 بجے برینٹ فیوچر 20 سینٹ یا 0.3 فیصد کی کمی سے 74.23 ڈالر بیرل پر آگیا جبکہ یو ایس ویسٹ ٹیکساس انٹرمیڈیٹ کروڈ فیوچر 28 سینٹ یا 0.4 فیصد کی کمی سے 70.12 ڈالر فی بیرل پر آگیا۔

دونوں معاہدوں میں جمعہ کو 2 ڈالر سے زیادہ کی کمی واقع ہوئی ، جس سے ہفتہ وار کمی بھی ہوئی۔