فخر زمان چیمپئنز ٹرافی سے باہر، امام الحق کی قومی ٹیم میں شمولیت کا امکان

آئی سی سی چیمپئنز ٹرافی 2025 میں قومی کرکٹ ٹیم کے اوپنر فخر زمان انجری کی جگہ امام الحق کو ٹیم میں شامل کیے جانے کا امکان ہے۔

واضح رہے کہ اوپنر فخر زمان انجری کے باعث چیمپئنز ٹرافی سے باہر ہو گئے ہیں۔ ذرائع کے مطابق ڈاکٹرز نے انہیں مکمل آرام کا مشورہ دے دیا ہے اور کھیلنے سے منع کردیا ہے۔

پاکستان کرکٹ بورڈ (پی سی بی) نے تصدیق کی ہے کہ فخر زمان 23 فروری کو روایتی حریف بھارت کے خلاف میچ کے لیے ٹیم کے ساتھ دبئی نہیں جائیں گے۔

توقع ہے کہ بین الاقوامی کرکٹ کونسل (آئی سی سی) مناسب وقت پر باضابطہ اپ ڈیٹ جاری کرے گی۔

یاد رہے کہ فخرزمان نیوزی کیخلاف میچ کے پہلے اوور میں فیلڈنگ کرتے ہوئے زخمی ہوگئے تھے، نتیجتاً وہ کچھ دیر میدان سے باہر رہے اور فیلڈنگ قوانین کی وجہ سے چوتھے نمبر پر بیٹنگ کرنے آئے۔

پاکستان نے 321 رنز کے ہدف کا تعاقب کرتے ہوئے پہلے پاور پلے میں صرف 22 رنز بنائے، یہ پاکستان کا ہوم گراؤنڈ پر پاور پلے کا بدترین اسکور تھا۔

میچ میں جب فخر زمان بیٹنگ کے لیے آئے تو درد میں نظر آئے ۔ مائیکل بریسویل کے ہاتھوں آؤٹ ہونے سے قبل انہوں نے 41 گیندوں پر 58.53 کے اسٹرائیک ریٹ سے 24 رنز بنائے۔

اننگز کے آخری حصے میں پاکستان کی بولنگ کافی خراب رہی، گرین شرٹس نے آخری 25 اوورز میں 207 رنز اور آخری 10 اوورز میں 94 رنز دیے۔