رواں مالی سال کی پہلی ششماہی، چیئرمین ایف بی آر نے ریونیو شارٹ فال کی وجہ بتادی

فیڈرل بورڈ آف ریونیو (ایف بی آر) کے چیئرمین راشد محمود لنگڑیال نے انکشاف کیا ہے کہ ایف بی آر کو 25-2024 کے پہلے چھ ماہ (جولائی تا دسمبر) کے دوران 384 ارب روپے کے شارٹ فال کا سامنا کرنا پڑا ہے جس کی وجہ بجٹ (25-2024) کے وقت متوقع محصولات کی وصولی میں خود مختار نمو میں سست روی ہے۔

چیئرمین ایف بی آر نے سینیٹ کی قائمہ کمیٹی برائے خزانہ کو بتایا کہ محصولات کی وصولی کے طریقہ کار کے جائزے سے معلوم ہوا ہے کہ اس عرصے کے دوران محصولات میں کمی کے ذمہ دار عوامل میں ایکسچینج ریٹ میں استحکام، توقع سے کم افراط زر، لارج اسکیل مینوفیکچرنگ سیکٹر کی سست بحالی اور توقع سے کم جی ڈی پی گروتھ ریٹ شامل ہیں۔

انہوں نے کہا کہ یہ رجحان جنوری اور فروری 2025 میں بھی جاری رہنے کا امکان ہے تاہم رواں مالی سال کے آخری چار ماہ میں شرح نمو میں تیزی آئے گی لہٰذا مارچ تا جون (25-2024) کے دوران خود مختار ترقی کی وجہ سے محصولات کی وصولی میں مزید کوئی نقصان نہیں ہوگا۔

چیئرمین ایف بی آر نے پیش گوئی کی کہ فروری 2025 تک خود مختار ترقی میں مجموعی نقصان کا تخمینہ 447 ارب روپے لگایا گیا ہے۔

فنانس ایکٹ 2024 میں 1.3 ٹریلین روپے کے پالیسی اقدامات بھی رئیل اسٹیٹ اور ٹریڈرز جیسے طرز عمل میں تبدیلیوں اور تخمینہ غلطیوں کی وجہ سے توقع سے کم وصولی دکھا رہے ہیں۔

چیئرمین ایف بی آر نے کہا کہ مالی سال 25-2024 کے پہلے چھ ماہ میں پالیسی اقدامات کی وجہ سے ہونے والے نقصان کا تخمینہ 251 ارب روپے لگایا گیا ہے جو اگر اصلاحی اقدامات نہ کیے گئے تو 539 ارب روپے تک جانے کی توقع ہے۔

خوردہ فروشوں کی تعداد پچھلے سال 0.2 ملین سے بڑھ کر اس سال 0.6 ملین ہوگئی۔ رواں سال کے دوران انکم ٹیکس گوشوارے جمع کرانے والوں کے ساتھ ادا کیے جانے والے ٹیکس میں بھی 105 ارب روپے کا اضافہ ہوا ہے۔

اجلاس کے دوران کمیٹی کو مالی سال کی پہلی ششماہی کے دوران پاکستان کے موجودہ ریونیو شارٹ فال 384 ارب روپے کے بارے میں بریفنگ دی گئی۔ ایف بی آر نے 5 ہزار 624 ارب روپے ٹیکس جمع کیے جو ہدف 6 ہزار 8 ارب روپے سے کم ہے۔ 25-2024 کی دوسری سہ ماہی میں ٹیکس ٹو جی ڈی پی کا تناسب بڑھ کر 10.8 فیصد ہو گیا ہے جو پہلی سہ ماہی میں 9.5 فیصد تھا، حالانکہ یہ پروگرام کے اختتام تک آئی ایم ایف کے متفقہ ہدف 13.6 فیصد سے کم ہے۔ اس کے مقابلے میں ہندوستان کا ٹیکس ٹو جی ڈی پی تناسب 18 فیصد ہے۔

چیئرمین ایف بی آر نے کہا کہ اگر آپ ریونیو بڑھانے کے لیے ایف بی آر کی کوششوں کا اندازہ لگانا چاہتے ہیں تو اس کی عکاسی ٹیکس ٹو جی ڈی پی کے تناسب میں اضافے سے ہوتی ہے۔ سینیٹر سلیم مانڈوی والا نے ایف بی آر کی جانب سے سیلز ٹیکس وصولی کے طریقہ کار پر تحفظات کا اظہار کرتے ہوئے کہا کہ کئی بار ہم نے ایف بی آر سے اشیا پر سیلز ٹیکس وصول کرنے کا کہا لیکن ایف بی آر نے اس کی مخالفت کی۔

کاپی رائٹ بزنس ریکارڈر، 2025