اوگرا نے کیپٹو پاور پلانٹس کیلئے گیس ٹیرف میں اضافہ کردیا

آئل اینڈ گیس ریگولیٹری اتھارٹی (اوگرا) نے کیپٹو پاور پلانٹس کے لیے گیس ٹیرف میں اضافہ کردیا۔

نوٹیفکیشن کے مطابق کیپٹو پاور پلانٹس کے لیے 3500 روپے فی ایم ایم بی ٹی یو گیس کی قیمت مقرر کی گئی ہے۔

نئی قیمتوں کا اطلاق یکم فروری 2025 سے ہوگا۔ اوگرا نے واضح کیا کہ کمرشل تندور اور گھریلو صارفین کے لیے گیس کی قیمتوں میں اضافہ نہیں کیا گیا۔

سی این جی اسٹیشنز، فرٹیلائزرز اور پاور اور سیمنٹ سیکٹر کے لیے گیس کی قیمتوں میں اضافہ نہیں کیا گیا۔

اس سے قبل وفاقی کابینہ کی اقتصادی رابطہ کمیٹی (ای سی سی) نے صنعتی شعبے کے لیے گیس کے نرخوں میں اضافے کی منظوری دے دی تھی۔ وزارت خزانہ کی جانب سے جاری بیان کے مطابق یہ فیصلہ وفاقی وزیر خزانہ محمد اورنگزیب کی زیر صدارت ہونے والے اجلاس میں کیا گیا۔ ای سی سی نے وزارت پٹرولیم کی جانب سے کیپٹو پاور پلانٹس اور غیر محفوظ گھریلو صارفین کے لیے گیس ٹیرف بڑھانے کی تجویز پر غور کیا۔

کمیٹی نے مالی سال 25-2024 کے دوران گیس کے شعبے کے لئے مطلوبہ آمدنی حاصل کرنے کے لئے کیپٹو پاور پلانٹس کے لئے گیس ٹیرف میں اضافے کی منظوری دی۔ منظور شدہ نرخوں کے مطابق کیپٹو پاور پلانٹس کے لیے گیس ٹیرف 3 ہزار روپے سے بڑھا کر 3 ہزار 500 روپے فی ایم ایم بی ٹی یو کردیا گیا ہے۔

تاہم کمیٹی نے فیصلہ کیا کہ گھریلو صارفین پر اضافی مالی بوجھ سے بچنے کے لیے گیس کی قیمتوں میں کوئی تبدیلی نہیں کی جائے گی۔

کاپی رائٹ بزنس ریکارڈر، 2025