ایف بی آر کا شوگر ملز کی ویڈیو سرویلنس کرنے کا فیصلہ

فیڈرل بورڈ آف ریونیو (ایف بی آر) نے ویڈیو سرویلنس، ویڈیو اینالٹکس اور ڈیجیٹل آئی سلوشن کے ذریعے تمام شوگر ملز کی پیداوار کی نگرانی کرنے کا فیصلہ کیا ہے۔

اس سلسلے میں ایف بی آر نے سیلز ٹیکس رولز 2006 میں ترمیم کے لیے ایس آر او 2082 (ایل) 2024 جاری کیا ہے۔

تمام شوگر ملز میں ڈیجیٹل آئی سلوشن کی تنصیب کے بعد ایف بی آر، ڈائریکٹوریٹ آف انٹیلی جنس اور متعلقہ فیکس آفس ویڈیو سرویلنس کے ذریعے اپنے دفاتر سے پیداوار کی نگرانی کرسکتے ہیں۔

پاکستان میں 80 آپریشنل شوگر ملیں ہیں جو مقامی کھپت کے ساتھ ساتھ برآمد کے لیے چینی پیدا کرتی ہیں، اس کے ساتھ ساتھ گڑ اور ایتھنول کی پیداوار اور برآمد بھی ہوتی ہیں جس کے نتیجے میں ملک کے لیے زرمبادلہ کے ذخائر میں اضافہ ہوتا ہے۔

اس وقت پانچ نگرانی کے نظام موجود ہیں، جن میں ٹریک اینڈ ٹریس اسٹیمپس، تیار شدہ تھیلوں کی گنتی کے لیے ہوپرز میں آٹومیٹڈ کاؤنٹرز، ویڈیو ریکارڈنگ اور ڈیجیٹل آئی گنتی، چینی کی تمام ترسیل کے لیے ٹریک انوائسنگ سسٹم اور چینی کی مینوفیکچرنگ اور نگرانی میں فروخت کی نگرانی کے لیے عملے کی تعیناتی شامل ہیں۔ پورے نظام میں شفافیت کو یقینی بنانے کے لیے وفاقی تحقیقاتی ادارے (ایف آئی اے) اور انٹیلی جنس بیورو (آئی بی) کی ٹیمیں بھی اس پورے عمل کی نگرانی کر رہی ہیں۔

نئے نظام کی افادیت کو ہر مل میں ایف بی آر اہلکاروں کی تعیناتی اور مربوط سی سی ٹی وی کیمروں کے ذریعے سسٹم اور اہلکاروں کی نگرانی اور ایف بی آر کے سینئر افسران کے بار بار دوروں کے ساتھ ساتھ فیلڈ میں ان لینڈ ریونیو انفورسمنٹ نیٹ ورک کی جانب سے رینڈم چیکنگ کے ذریعے یقینی بنایا گیا ہے۔

پولیس اور پاکستان رینجرز کے تعاون سے نفاذ کے اقدامات میں مزید اضافہ ہوتا ہے، جو ضرورت پڑنے پر نگرانی اور نفاذ کے اقدامات میں مدد فراہم کرتے ہیں۔

نوٹیفکیشن کے مطابق کسی بھی یا تمام اشیاء کی نگرانی ویڈیو سرویلنس، ویڈیو اینالٹکس اور ڈیجیٹل آئی کے ذریعے کی جائے گی جیسا کہ بورڈ کی جانب سے ایک مخصوص آرڈر کے ذریعے مطلع کیا گیا ہے۔

کاپی رائٹ بزنس ریکارڈر، 2025