جی ایس پی کی منظوری کے بعد پاک , یورپی یونین تعلقات میں نمایاں پیشرفت

پاکستان اور یورپی یونین (ای یو) نے تسلیم کیا ہے کہ 2014 میں جی ایس پی اسٹیٹس ملنے کے بعد دوطرفہ تجارتی اور اقتصادی تعلقات میں نمایاں پیش رفت ہوئی ہے۔

یورپی یونین نے سزائے موت کے خاتمے پر اپنے موقف کو دہرایا اور رحم کی درخواست کے اصلاحی عمل کو آگے بڑھانے کی ضرورت پر زور دیا۔

وزارت خارجہ (ایف او) نے اسلام آباد میں 14ویں پاکستان-یورپی یونین جوائنٹ کمیشن اجلاس کے بعد جمعہ کو مشترکہ بیان جاری کیا۔

یورپی یونین پاکستان کا دوسرا سب سے بڑا تجارتی پارٹنر ہے، اور جنرلائزڈ اسکیم آف پریفرینسز پلس (جی ایس پی پلس) کے انتظام نے دو طرفہ تجارت میں اہم کردار ادا کیا ہے۔ دونوں فریقوں نے ایک مضبوط کثیرالجہتی تجارتی نظام کی اہمیت پر زور دیا اور عالمی تجارتی تنظیم (ڈبلیو ٹی او)، کثیر فریقی اور دو طرفہ سطح پر حالیہ پیش رفت پر تبادلہ خیال کیا۔

ملاقات میں پاکستان اور یورپی یونین کے درمیان دوطرفہ تجارتی تعلقات پر تفصیلی تبادلہ خیال کیا گیا جس میں دونوں ممالک کے لیے مارکیٹ تک رسائی کے چیلنجز سمیت مختلف موضوعات کا احاطہ کیا گیا۔ خصوصی دلچسپی کے دیگر شعبوں کے علاوہ جی ایس پی پلس پر عمل درآمد پر تعاون نمایاں تھا۔

مشترکہ کمیشن کی مشترکہ صدارت پاکستان کی وزارت اقتصادی امور کے سیکرٹری ڈاکٹر کاظم نیاز اور یورپین ایکسٹرنل ایکشن سروس میں ایشیا اور بحرالکاہل کے ڈپٹی منیجنگ ڈائریکٹر پاولا پامپالونی نے کی۔

ملاقات میں پاکستان اور یورپی پارلیمنٹ میں انتخابی عمل سمیت حالیہ سیاسی پیش رفت کا جائزہ لیا گیا۔

پاکستان اور یورپی یونین نے گلوبل گیٹ وے حکمت عملی پر توجہ مرکوز کرتے ہوئے خاص طور پر تجارت، انسانی حقوق، سیاسی، اقتصادی اور ترقیاتی تعاون جیسے شعبوں میں اپنے تعاون اور پائیدار روابط کی اہمیت کو تسلیم کیا۔

فریقین نے خوراک، توانائی کی سلامتی اور موسمیاتی تبدیلی کے ابھرتے ہوئے چیلنجz پر تعاون جاری رکھنے پر اتفاق کیا۔

فریقین نے پاکستان اور یورپی یونین میں انتخابات کے بعد کی سیاسی صورتحال کا جائزہ لیا۔ انہوں نے انتخابی عمل کو مضبوط بنانے کے لئے مسلسل کوششوں کی ضرورت پر اتفاق کیا۔ یورپی یونین نے جمہوری اقدار، آزاد میڈیا، متحرک سول سوسائٹی، عدالتی آزادی اور انسانی حقوق کے بین الاقوامی معیارات کی اہمیت کا اعادہ کیا، جو جمہوری انتخابات کے لئے کلیدی ہیں.

فریقین نے تمام انسانی حقوق بشمول خواتین اور بچوں کے حقوق، مزدوروں اور تارکین وطن کے حقوق کے ساتھ ساتھ بنیادی آزادیوں جیسے اظہار رائے بشمول غلط معلومات کے بڑھتے ہوئے مسئلے کے تحفظ کے عزم کا اعادہ کیا۔

پاکستان نے اپنا اصلاحاتی ایجنڈا پیش کیا جس میں نیشنل ایکشن پلان برائے انسانی حقوق، نیشنل ایکشن پلان آن بزنس اینڈ ہیومن رائٹس کے فریم ورک کے ساتھ ساتھ جی ایس پی پلس سے متعلق 27 بین الاقوامی کنونشنز پر مکمل عملدرآمد کے لیے اقدامات شامل ہیں۔ پاکستان اور یورپی یونین نے مذہب یا عقیدے کی آزادی اور اقلیتوں اور کمزور گروہوں سے تعلق رکھنے والے افراد کے حقوق اور مسلمانوں کے خلاف نفرت کے بارے میں خدشات پر بھی تبادلہ خیال کیا۔ فریقین نے ان مشترکہ خدشات پر بات چیت جاری رکھنے کی اہمیت کا اعادہ کیا۔

یورپی یونین پاکستان کو یورپی یونین کے ریگولیٹری فریم ورک کی تعمیل میں سہولت فراہم کرنے کیلئے اپنی آئندہ قانون سازی کی پیش رفت کے بارے میں معلومات فراہم کرنے کے لئے پرعزم ہے۔ پاکستان اور یورپی یونین نے پائیدار نمو اور تجارتی ترقی کو فروغ دینے کے لئے مسلسل تعاون کی اہمیت کا اعادہ کیا۔

یورپی یونین نے ایم آئی پی کے وسط مدتی جائزے کے بعد 2025-2027 کی مدت کے لئے منصوبوں کی تفصیلات پیش کیں اور یورپی یونین کے پالیسی فریم ورک اور گلوبل گیٹ وے پر اپ ڈیٹ کیا۔

پاکستان نے ستمبر 2024 میں ہونے والے یورپین انوسٹمنٹ بینک کے حالیہ دورہ پاکستان کو سراہا اور نئی سرمایہ کاری کی نشاندہی کرکے گلوبل گیٹ وے کے فریم ورک کے اندر روابط بڑھانے کے موقع پر اتفاق کیا۔

کاپی رائٹ بزنس ریکارڈر، 2024