این ایس ٹی سی پر پاکستان کے ساتھ مل کر کام کرنے کے خواہاں ہیں، روسی سفیر

روس پاکستان کے ساتھ اپنے تجارتی تعلقات کو مضبوط بنانے کے لیے نارتھ ساؤتھ ٹریڈ کوریڈور (این ایس ٹی سی) روس، کرغزستان، ازبکستان، افغانستان اور پاکستان کے ساتھ کام کرنے کا خواہاں ہے۔

ان خیالات کا اظہار روسی فیڈریشن کے سفیر البرٹ کھوریف نے قونصل جنرل آندرے وی فیڈوروف کے ہمراہ کراچی کونسل آن فارن ریلیشنز (کے سی ایف آر) کے زیر اہتمام ”ایکسپورنگ دی ایولونگ ڈائنامکس آف پاکستان-روس ریلیشنز“ کے عنوان سے منعقدہ ایک تقریب سے خطاب کرتے ہوئے کیا۔

انہوں نے کہا کہ توقع ہے کہ پاکستان اور روس رواں ہفتے پاکستان اسٹیل ملز (پی ایس ایم) پر تکنیکی مشاورت شروع کریں گے۔

روسی سفیر نے کہا کہ پاکستان اور روس کے درمیان پی ایس ایم کا معاملہ روسی وفد کے حالیہ دورہ اسلام آباد کے دوران زیر بحث آیا تھا۔ انہوں نے کہا کہ ”دونوں فریقین نے دوطرفہ ماہرین کی مشاورت آن لائن منعقد کرنے پر اتفاق کیا ہے“، انہوں نے مزید کہا کہ یہ مشاورت اس ہفتے ہونے والی ہے۔

مزید برآں، انہوں نے بتایا کہ پاکستان نے روس کو تجویز دی ہے کہ وہ پی ایس ایم کے زمینی حقائق کا جائزہ لینے کے لئے ماہرین کو کراچی بھیجے۔ روسی سفیر نے کہا، “ہم اس پیش رفت کو ایک امید افزا آغاز کے طور پر دیکھتے ہیں۔

انہوں نے اس بات پر بھی زور دیا کہ پاکستان ایشیا میں روس کی ترجیح ہے۔ انہوں نے بتایا کہ روس نے 70 لاکھ بیرل خام تیل کی پہلی کھیپ پاکستان بھیجی ہے اور دونوں ممالک کے درمیان دوطرفہ تجارت بالخصوص زراعت کے شعبے میں بڑھ رہی ہے۔

شنگھائی تعاون تنظیم (ایس سی او) کے 23 ویں سربراہ اجلاس کی میزبانی پر پاکستان کو مبارکباد دیتے ہوئے روسی سفیر نے کہا کہ روس پاکستان کی برکس میں شمولیت کے لیے پرجوش ہے۔

فلسطین اسرائیل تنازع پر تبصرہ کرتے ہوئے روسی سفیر نے کہا کہ اس مسئلے کو اقوام متحدہ کی سلامتی کونسل کی 1967 میں منظور کردہ قرارداد 242 کے تحت حل کیا جانا چاہئے اور عالمی طاقتوں پر زور دیا کہ وہ موجودہ صورتحال میں تیسری عالمی جنگ کے امکانات کو روکنے میں مدد کریں۔

انہوں نے کہا کہ ہمیں مشرق وسطیٰ میں فلسطین اور اسرائیل کے تنازعے میں اضافے پر گہری تشویش ہے جو اب لبنان اور شام تک پھیل چکا ہے۔ انہوں نے امریکی کردار پر تنقید کرتے ہوئے دنیا پر زور دیا کہ وہ کشیدگی میں کمی کے لیے اپنا کردار ادا کرے، اس سے خطے میں عدم استحکام پیدا ہوگا۔

انہوں نے کہا کہ روس پاکستان کے ساتھ دفاعی تعلقات کو وسعت دینے میں دلچسپی رکھتا ہے اور روسی فیڈریشن کی مسلح افواج کے ڈپٹی چیف آف جنرل اسٹاف کرنل جنرل سرگئی یوریوچ استراکوف نے اکتوبر 2024 میں پاکستان کا دورہ کیا تھا۔

ٹرمپ کے بیان پر تبصرہ کرتے ہوئے انہوں نے کہا کہ صدر پوٹن نے یوکرین کے بارے میں نومنتخب صدر ڈونلڈ ٹرمپ کے بیان کو ”دلچسپ“ اور نتائج خیز قرار دیا۔

کے سی ایف آر کی چیئرپرسن نادرہ پنجوانی نے روسی سفیر پر زور دیا کہ وہ دوطرفہ تعلقات کو مضبوط بنانے کے لئے دونوں ممالک کے درمیان ثقافتی اور تعلیمی روابط کو بڑھانے کے لئے مزید کوششیں کریں۔

کاپی رائٹ بزنس ریکارڈر، 2024