فاطمہ ثنا آئی سی سی ویمنز ٹی ٹوئنٹی ورلڈ کپ میں پاکستان کی قیادت کریں گی

پاکستان کرکٹ بورڈ (پی سی بی) نے آئی سی سی ویمنز ٹی ٹوئنٹی ورلڈ کپ 2024 کے لیے فاطمہ ثنا کو پاکستان ویمنز کرکٹ ٹیم کی کپتان مقرر کردیا ہے۔

یہ ٹورنامنٹ 3 سے 20 اکتوبر تک متحدہ عرب امارات (یو اے ای) میں کھیلا جائے گا۔ یہ فیصلہ خواتین کی قومی سلیکشن کمیٹی نے متفقہ طور پر کیا۔

41 ون ڈے اور 40 ٹی ٹوئنٹی میچز کا تجربہ رکھنے والی 22 سالہ فاطمہ اس سے قبل پاکستان کی ایمرجنگ اور ڈومیسٹک ٹیموں کی قیادت کر چکی ہیں۔ انہوں نے دسمبر 2023 میں کرائسٹ چرچ کے ہیگلی اوول میں نیوزی لینڈ کے خلاف سپر اوور میں پاکستانی ٹیم کی قیادت بھی کی تھی۔

فاطمہ 37 سالہ آل راؤنڈر ندا ڈار کی جگہ لیں گی جنہوں نے بسمہ معروف کی جگہ آل فارمیٹ کی کپتانی سنبھالی ہے۔ 112 ون ڈے اور 153 ٹی ٹوئنٹی میچز کھیلنے والی ندا اس ٹیم کا حصہ ہیں جسے گروپ اے میں آسٹریلیا، بھارت، نیوزی لینڈ اور سری لنکا کے ساتھ رکھا گیا ہے۔

سلیکشن کمیٹی نے گزشتہ ماہ سری لنکا میں ہونے والے اے سی سی ویمنز ایشیا کپ میں حصہ لینے والے اسکواڈ میں صرف ایک تبدیلی کی ہے۔ جنوبی افریقہ میں ہونے والے آئی سی سی ویمنز ٹی 20 ورلڈ کپ 2023 کا حصہ رہنے والی دائیں ہاتھ کی بلے باز صدف شمس کو وکٹ کیپر بلے باز ناجیہ علوی کی جگہ ٹیم میں شامل کیا گیا ہے جو ریزرو کھلاڑی کی حیثیت سے ٹیم کے ساتھ سفر کریں گی۔

2023 کے ایڈیشن سے 10 کھلاڑیوں (عالیہ ریاض، فاطمہ ثنا، منیبہ علی، ناشرہ سندھو، ندا ڈار، عمیمہ سہیل، صدف شمس، سعدیہ اقبال، سدرہ امین اور طوبیٰ حسن) کو برقرار رکھا گیا ہے جبکہ بائیں ہاتھ کی تیز گیند باز تسمیہ رباب کو فائنل 15 میں جگہ ملی ہے۔ لیفٹ آرم اسپنر سعدیہ اقبال کی اسکواڈ میں شمولیت فٹنس سے مشروط ہے۔

آئی سی سی ویمنز ٹی ٹوئنٹی ورلڈ کپ 2024 کے لیے پاکستان اسکواڈ: فاطمہ ثنا (کپتان)، عالیہ ریاض، ڈیانا بیگ، گل فیروزہ، ارم جاوید، منیبہ علی (وکٹ کیپر)، ناصرہ سندھو، ندا ڈار، عمائمہ سہیل، صدف شمس، سعدیہ اقبال (فٹنس سے مشروط)، سدرہ امین، سیدہ عروب شاہ، تسمیہ رباب اور طوبیٰ حسن۔

ٹریولنگ ریزرو: ناجیحہ علوی (وکٹ کیپر)

نان ٹریولنگ ریزرو : رمین شمیم اور ام ہانی