رائے

امیروں کو دی جانے والی مراعات کے ثمرات خودبخود نچلے طبقے تک نہیں پہنچتے

  • ’’امیر طبقے کو ٹیکسوں میں چھوٹ اور مالیاتی مراعات دینے سے معاشی ترقی کے ثمرات خودبخود غریب اور متوسط طبقے تک نہیں پہنچتے، بلکہ اس کے برعکس آمدنی میں عدم مساوات مزید بڑھ جاتی ہے۔‘‘
شائع اپ ڈیٹ

معاشیات میں دولت کے ثمرات بتدریج نچلے طبقے تک پہنچنے (ٹرکل ڈاؤن) کا تصور اس مفروضے پر مبنی ہے کہ مالیاتی اور زری مراعات کے ساتھ بعض متعلقہ پالیسی اقدامات، جن میں ضابطوں میں نرمی، یعنی اشیا اور خدمات کی قیمتوں کا تعین مارکیٹ پر چھوڑنا، نجکاری اور دیگر صارفین کے مقابلے میں سستے خام مال تک رسائی شامل ہیں، پیداوار میں اضافے اور نتیجتاً معاشی ترقی کا باعث بنیں گے۔

اس تصور میں یہ تسلیم کیا جاتا ہے کہ ابتدائی طور پر ان مراعات کا فائدہ نجی شعبے میں پیداواری ذرائع کے مالکان کو پہنچے گا، تاہم یہ مراعات انہیں اپنے کاروبار میں دوبارہ سرمایہ کاری پر آمادہ کریں گی، جس کے نتیجے میں روزگار کے نئے مواقع پیدا ہوں گے اور وقت گزرنے کے ساتھ ان ملازمتوں کی اجرت بھی ابتدائی سطح کے مقابلے میں بڑھ جائے گی۔

اس ضمن میں دو سوالات کا جائزہ لینا ضروری ہے۔ کیا معاشی لٹریچر میں دولت کے ثمرات نچلے طبقے تک پہنچنے کے تصور کو باقاعدہ معاشی نظریے کے طور پر تسلیم کیا جاتا ہے؟ اور اگر ایسا نہیں ہے تو کیا اس کی حمایت میں کوئی عملی شواہد موجود ہیں؟ پہلے سوال کا جواب واضح طور پر نفی میں ہے۔

وارٹن اسکول میں کاروباری معاشیات اور عوامی پالیسی کے پروفیسر بینجمن لاک ووڈ کے مطابق، ’’ٹرکل ڈاؤن اکنامکس کی اصطلاح دراصل کسی مربوط معاشی نظریے کی نمائندگی نہیں کرتی، بلکہ اسے عموماً منفی مفہوم میں اس تصور کے لیے استعمال کیا جاتا ہے کہ امیر طبقے پر ٹیکسوں میں کمی سے غیر امیر طبقے کو بھی فائدہ پہنچے گا۔‘‘

ٹرکل ڈاؤن کی اصطلاح یا تصور سب سے پہلے امریکی مزاحیہ فنکار ول راجرز نے متعارف کرایا تھا، جنہوں نے 1929ء کے عظیم معاشی بحران کے دوران صدر ہربرٹ ہوور کی پالیسیوں پر تنقید کے لیے اسے استعمال کیا۔

آج یہ اصطلاح اکثر رسد پر مبنی معاشیات (سپلائی سائیڈ اکنامکس) کے متبادل کے طور پر استعمال ہوتی ہے، جسے ماہرین معاشیات آرتھر لیفر اور رابرٹ منڈیل نے مقبول بنایا، تاہم ان دونوں میں سے کسی نے بھی ٹرکل ڈاؤن کی اصطلاح استعمال نہیں کی تھی۔ لیفر کا مشہور منحنی خط (لیفر کرو) اس تصور کی وضاحت کرتا ہے کہ ٹیکسوں میں کمی سے مجموعی محصولات میں اضافہ ہوسکتا ہے، جس کا مطلب یہ ہے کہ ٹیکس کی شرح صفر اور 100 فیصد کے درمیان کوئی ایسی موزوں سطح موجود ہوتی ہے جہاں محصولات زیادہ سے زیادہ حاصل کیے جاسکتے ہیں۔ دوسری جانب منڈیل کا مؤقف تھا کہ حکومتوں کو مجموعی طلب کو سرکاری اخراجات یا ٹیکسوں کے ذریعے کنٹرول کرنے کے بجائے ایسی پالیسیوں کی حمایت کرنی چاہیے جو پیداوار اور سرمایہ کاری کی حوصلہ افزائی کریں۔

ایسا کوئی عملی ثبوت موجود نہیں جو یہ ظاہر کرے کہ دولت کے ثمرات نچلے طبقے تک پہنچنے کا نظریہ کبھی کامیاب بھی ہوا ہے۔

جون 2015ء میں عالمی مالیاتی فنڈ (آئی ایم ایف) کے عملے کی ایک رپورٹ بعنوان ’’آمدنی میں عدم مساوات کے اسباب اور نتائج: ایک عالمی جائزہ‘‘ میں مصنفین ایرا ڈابلا نورس، کلپنا کوچر، نجین سپہاپھیفٹ، فرانٹیسک ریکا اور ایوریدیکی تسونٹا نے یہ نتیجہ اخذ کیا کہ ’’غریب اور متوسط طبقے کی آمدنی میں حصہ بڑھانے سے درحقیقت معاشی ترقی کی رفتار تیز ہوتی ہے، جبکہ آبادی کے امیر ترین 20 فیصد طبقے کی آمدنی میں اضافے سے ترقی کی رفتار سست پڑ جاتی ہے۔ دوسرے الفاظ میں، جب امیر مزید امیر ہوتے ہیں تو اس کے ثمرات خودبخود نچلے طبقے تک نہیں پہنچتے۔‘‘

رپورٹ کے مطابق اس سے ظاہر ہوتا ہے کہ پالیسیوں کو ہر ملک کے مخصوص حالات کے مطابق مرتب کیا جانا چاہیے، تاہم ان کا بنیادی مقصد غریب طبقے کی آمدنی میں حصہ بڑھانا اور متوسط طبقے کو کمزور ہونے سے بچانا ہونا چاہیے۔

آمدنی میں عدم مساوات پر قابو پانے کے لیے ابھرتی ہوئی اور ترقی پذیر معیشتوں میں مالیاتی خدمات تک عوام کی رسائی (فنانشل انکلوژن) ناگزیر ہے، جبکہ ترقی یافتہ معیشتوں میں پالیسیوں کا محور انسانی سرمائے اور مہارتوں میں اضافہ اور ٹیکس کے نظام کو زیادہ ترقی پسندانہ بنانا ہونا چاہیے۔ دوسرے الفاظ میں، امیر طبقے کو مالیاتی اور زری مراعات دینے سے ان کے ثمرات نچلے طبقے تک نہیں پہنچتے، بلکہ اس کے برعکس کارپوریٹ منافع، اعلیٰ انتظامی عہدیداروں کے معاوضوں، کمپنیوں کی جانب سے اپنے ہی حصص کی دوبارہ خریداری اور بیرون ملک بینک کھاتوں میں دولت جمع ہونے کا رجحان بڑھتا ہے۔

پیرس میں قائم ادارے اقتصادی تعاون و ترقی کی تنظیم (او ای سی ڈی) کی ایک تحقیق بھی اس نتیجے کی تائید کرتی ہے۔ اخبار گارجین کے مطابق، تحقیق میں بتایا گیا کہ 1980ء کی دہائی میں برطانوی وزیراعظم مارگریٹ تھیچر اور امریکی صدر رونالڈ ریگن کی بنیادی پالیسیوں میں ٹرکل ڈاؤن اکنامکس کو مرکزی حیثیت حاصل تھی۔ برطانیہ کی کنزرویٹو پارٹی اور امریکا کی ری پبلکن پارٹی کو یقین تھا کہ ٹریڈ یونینز کو کمزور کرنے اور دولت کی تخلیق کی حوصلہ افزائی کے لیے بنائی گئی پالیسیوں سے معاشرے کے تمام طبقات کو فائدہ پہنچے گا۔

تاہم او ای سی ڈی کے مطابق، اب آبادی کے امیر ترین 10 فیصد طبقے کی آمدنی غریب ترین 10 فیصد طبقے کے مقابلے میں 9.5 گنا زیادہ ہوچکی ہے، جو 1980ء کی دہائی میں سات گنا تھی۔ اس کے باوجود معاشی ترقی کی رفتار تیز ہونے کے بجائے سست رہی۔ تنظیم نے نتیجہ اخذ کیا کہ آمدنی میں عدم مساوات کے معاشی ترقی پر نمایاں اور شماریاتی اعتبار سے منفی اثرات مرتب ہوتے ہیں، جبکہ قابلِ صرف آمدنی میں زیادہ مساوات پیدا کرنے والی ازسرِنو تقسیم کی پالیسیوں سے معاشی ترقی کو کوئی نقصان نہیں پہنچتا۔ اس کا مطلب یہ ہے کہ امیر طبقے کے لیے ٹیکسوں میں کمی یا قرضوں کی مد میں مراعات دینا معاشی ترقی کو فروغ دینے کا مؤثر ذریعہ نہیں ہے۔

لندن اسکول آف اکنامکس اور ہوپ اینڈ لمبرگ کی جانب سے کی جانے والی تحقیقات بھی اسی نتیجے پر پہنچی ہیں۔ ان مطالعات کے مطابق، امیر طبقہ ٹیکسوں میں چھوٹ سے حاصل ہونے والی اضافی آمدنی کا نسبتاً زیادہ حصہ بچا کر رکھتا ہے، جبکہ اس کے مقابلے میں غریب طبقے کی بچت کا تناسب کم ہوتا ہے۔ مزید یہ کہ سرمایہ ایک ملک سے دوسرے ملک منتقل کرنا، خواہ قانونی طریقوں سے ہو یا غیر قانونی ذرائع اختیار کرکے، نسبتاً آسان ہے۔ چنانچہ یہ بچتیں ضروری نہیں کہ اسی ملک میں واپس آئیں جہاں سے یہ حاصل کی گئی ہوں، یا انہیں مقامی پیداوار میں سرمایہ کاری کے ابتدائی سرمائے کے طور پر استعمال کیا جائے، جو معاشی ترقی کو فروغ دے سکتی تھی۔

حیران کن طور پر پوپ فرانسس نے بھی 2013ء میں ٹرکل ڈاؤن کے تصور کے حوالے سے ٹھوس شواہد کی عدم موجودگی کی نشاندہی کی تھی۔ ان کا کہنا تھا:

’’بعض لوگ اب بھی ٹرکل ڈاؤن نظریات کا دفاع کرتے ہیں، جن کے مطابق آزاد منڈی کے ذریعے حوصلہ افزائی کی جانے والی معاشی ترقی لازماً دنیا میں زیادہ انصاف اور شمولیت کو یقینی بنائے گی۔

یہ ایسا نقطہ نظر ہے جس کی کبھی حقائق سے تصدیق نہیں ہوئی۔ یہ معاشی طاقت رکھنے والوں کی نیکی اور موجودہ معاشی نظام کے تقدس پر ایک سادہ لوح اور سطحی اعتماد کا اظہار ہے۔ اس دوران معاشرے سے محروم کیے گئے طبقات اب بھی اپنے حصے کے ثمرات کے منتظر ہیں۔‘‘

نجکاری کے حق میں یہ دلیل بھی دی جاتی ہے کہ اس سے پیداوار میں اضافہ اور نظام کی خامیوں میں کمی آئے گی، کیونکہ یہ سمجھا جاتا ہے کہ سرکاری شعبہ نجی شعبے جتنا مؤثر نہیں ہوتا۔

تاہم نوبیل انعام یافتہ ماہرِ معاشیات جوزف اسٹگ لٹز نے نشاندہی کی ہے کہ سرکاری ملکیتی اداروں پر تنقید کرنے والوں کا مؤقف ہوتا ہے کہ ان اداروں میں بدعنوانی پائی جاتی ہے اور سرکاری عہدیدار ہمیشہ عوامی مفاد میں کام نہیں کرتے۔ اس ضمن میں ان کا کہنا ہے:

’’داؤ پر صرف موجودہ منافع (یا اجارہ داری سے حاصل ہونے والی آمدنی) نہیں لگا ہوتا، بلکہ ان منافعوں کی مستقبل میں متوقع آمدنی کی موجودہ قدر بھی شامل ہوتی ہے، جو کہیں زیادہ ہوتی ہے۔ اس کے نتیجے میں اختیارات کے ناجائز استعمال کی ترغیبات بھی بڑھ جاتی ہیں۔

تجربات سے ظاہر ہوتا ہے کہ نجکاری کے عمل کے دوران بدعنوانی اور اختیارات کے ناجائز استعمال کو روکنا زیادہ مشکل ہوسکتا ہے۔ نجکاری کی ناکامیاں اس وقت سامنے آئیں جب اجارہ داریوں، بالخصوص قدرتی اجارہ داریوں، کو ضابطہ جاتی اور اجارہ داری مخالف نظام قائم کرنے سے پہلے ہی نجی شعبے کے حوالے کردیا گیا۔

نجی شعبہ اجارہ داری کی طاقت سے فائدہ اٹھانے میں حکومت سے زیادہ ماہر ثابت ہوا، جس کے نتیجے میں مجموعی معاشی کارکردگی میں کوئی بہتری نہیں آئی۔‘‘

اس کا مطلب یہ نہیں کہ تمام نجکاری کی مخالفت کی جائے، بلکہ اس بات پر زور دینا مقصود ہے کہ کسی بھی مخصوص شعبے میں کام کرنے والے ادارے کی نجکاری کا فیصلہ کرنے سے پہلے اس کا محتاط اور جامع جائزہ لینا ضروری ہے۔

برطانیہ کی سابق وزیراعظم لز ٹرس نے اپنے محض 45 روزہ دورِ وزارت عظمیٰ کے دوران امیر طبقے کے لیے ٹیکسوں میں نمایاں کمی کی تھی۔ اس اقدام کو ان کی شرمناک سیاسی ناکامی اور اقتدار سے بے دخلی کا ایک بڑا سبب قرار دیا جاتا ہے۔ تاہم مغربی دنیا کے دیگر رہنماؤں، جنہوں نے ٹرکل ڈاؤن کے تصور کی بھرپور حمایت کی، کو ایسی صورت حال کا سامنا نہیں کرنا پڑا، بالخصوص رونالڈ ریگن اور مارگریٹ تھیچر اس کی مثال ہیں۔

اس تصور کی حمایت میں ٹھوس شواہد اور عملی تحقیق کے فقدان کے باوجود پاکستان میں یکے بعد دیگرے آنے والی حکومتیں اس طرزِ معاشیات کو بھرپور انداز میں فروغ دیتی رہی ہیں اور آج بھی یہی سلسلہ جاری ہے۔

یہ دو حصوں پر مشتمل مضامین کی سیریز کا پہلا حصہ ہے، جس میں ٹرکل ڈاؤن نظریے کی حمایت میں ٹھوس عملی شواہد کی عدم موجودگی کو اجاگر کیا گیا ہے۔ دوسرے حصے میں ان پالیسیوں کی تفصیل پیش کی جائے گی جو پاکستان میں اس غیر واضح اور متنازع تصور کے اطلاق کی بھرپور حمایت کرتی ہیں۔

کاپی رائٹ بزنس ریکارڈر، 2026