بیسٹ وے گروپ کے اشتراک سے گیلی کی پاکستان میں انٹری، تین نئی توانائی سے چلنے والی گاڑیاں متعارف

چین کی آٹو کمپنی گیلی آٹو نے بیسٹ وے گروپ کے اشتراک سے پاکستان میں اپنی گاڑیاں متعارف کرا دی ہیں۔ اس موقع پر نئی توانائی سے چلنے والی تین گاڑیاں پیش کی گئیں، جن میں چھوٹی الیکٹرک ہیچ بیک گیلی ای ایکس 2، الیکٹرک ایس یو وی گیلی ای ایکس 5 اور پلگ اِن ہائبرڈ ایس یو وی گیلی اسٹارے ای ایم آئی شامل ہیں۔

تقریب سے خطاب کرتے ہوئے بیسٹ وے گروپ کے منیجنگ ڈائریکٹر عرفان محمد شیخ نے کہا کہ بیسٹ وے آٹوموٹیو پاکستان میں گیلی کی واحد مجاز ڈسٹری بیوٹر ہے۔

ایک بیان کے مطابق، گیلی کی گاڑیوں کی رونمائی کے ساتھ بیسٹ وے گروپ نے پاکستان کے آٹو موبائل شعبے میں قدم رکھا ہے۔ یہ پیش رفت ملک میں گروپ کے طویل مدتی سرمایہ کاری کے پورٹ فولیو میں ایک تزویراتی توسیع ہے۔

نئی توانائی سے چلنے والی گاڑیاں (این ای وی) متبادل ایندھن استعمال کرنے والی ایسی گاڑیاں ہیں جو روایتی اندرونی احتراقی انجن کے بجائے بنیادی طور پر یا مکمل طور پر برقی توانائی پر انحصار کرتی ہیں۔

تفصیلات کے مطابق، کمپنی ابتدا میں درآمد شدہ گاڑیوں کے ذریعے پاکستانی مارکیٹ میں داخل ہوگی، جبکہ کراچی میں پورٹ قاسم کے مقام پر واقع 24.71 ایکڑ پر محیط اپنے کارخانے کو مکمل طور پر کھلے پرزوں کی درآمد اور مقامی اسمبلنگ (سی کے ڈی) کے لیے تیار کر رہی ہے۔ اس کارخانے میں 4 لاکھ 3 ہزار مربع فٹ سے زیادہ کا احاطہ شدہ رقبہ موجود ہے اور یہاں سالانہ 25 ہزار گاڑیاں اسمبل کرنے کی گنجائش ہے۔ بیسٹ وے کا ہدف ہے کہ اگلے سال تک مقامی طور پر اسمبل کی گئی گیلی گاڑیاں سڑکوں پر رواں دواں ہوں۔

گاڑیوں کی ملکیت اور بعد از فروخت سہولتوں کے حوالے سے بیسٹ وے نے ملک بھر میں ڈیلرشپ نیٹ ورک قائم کرنے، گاڑیوں کے لیے چھ سال یا ڈیڑھ لاکھ کلومیٹر تک اور بیٹری و موٹر کے لیے آٹھ سال کی وارنٹی دینے کی تجویز پیش کی ہے۔ اس کے علاوہ آن لائن بکنگ، یونائیٹڈ بینک لمیٹڈ (یو بی ایل) کے ذریعے فنانسنگ اور بیسٹ وے رینیوایبل ٹیکنالوجیز کے تحت ملک گیر برقی گاڑیوں کے چارجنگ نیٹ ورک کے قیام کا منصوبہ بھی شامل ہے۔ بیسٹ وے سیمنٹ اس وقت اپنے استعمال کے لیے شمسی توانائی سے بجلی پیدا کرنے کی 115 میگاواٹ صلاحیت کا حامل نظام چلا رہی ہے۔

بیان کے مطابق، قیمتوں، بکنگ کی تاریخوں اور حتمی تفصیلات کا اعلان کمپنی کے باضابطہ ذرائع سے کیا جائے گا۔

پاکستان میں گاڑیوں کی فروخت مالی سال 2026-27 کی پہلی سہ ماہی میں سالانہ بنیاد پر 43 فیصد بڑھی۔ تجزیہ کاروں نے اس اضافے کو بہتر ہوتے ہوئے مجموعی معاشی حالات سے منسوب کیا ہے، جن کے باعث گاڑیوں کی طلب میں اضافہ ہوا۔

بیسٹ وے گروپ کی بنیاد 1976ء میں لندن میں ایک ریٹیل کاروبار کے طور پر رکھی گئی تھی۔ اب یہ گروپ تھوک تجارت، سیمنٹ، بینکاری، قابل تجدید توانائی اور دیگر شعبوں میں 63 ہزار سے زائد افراد کو روزگار فراہم کرتا ہے، جبکہ اس کی سالانہ آمدن 7.9 ارب ڈالر ہے۔ پاکستان میں گروپ بیسٹ وے سیمنٹ کا مالک ہے اور یونائیٹڈ بینک لمیٹڈ میں بھی اس کے حصص ہیں۔

گیلی ہولڈنگ گروپ کا قیام 1986ء میں عمل میں آیا تھا۔ بیان کے مطابق، گروپ نے 2025ء میں دنیا بھر میں تقریباً 41 لاکھ 20 ہزار گاڑیاں فروخت کیں، جن میں سے 22 لاکھ 90 ہزار، یعنی 56 فیصد، نئی توانائی سے چلنے والی گاڑیاں تھیں۔ گروپ کے برانڈز میں وولوو کارز، پول اسٹار، لوٹس، زیکر اور لنک اینڈ کو شامل ہیں۔ گروپ نے 2030ء تک عالمی سطح پر سالانہ 65 لاکھ گاڑیاں فروخت کرنے کا ہدف مقرر کیا ہے۔