میسی ہسپانوی کلب ایلڈینسے کے اکثریتی مالک بن گئے

ارجنٹائن اور بارسلونا کے سابق اسٹار لیونل میسی نے اسپین کے سیکنڈ ڈویژن کلب سی ڈی ایلڈینسے کی خریداری مکمل کرلی ہے، تاہم معاہدہ ریگولیٹری منظوری سے مشروط ہے۔ کلب نے جمعرات کو یہ اعلان کیا۔

39 سالہ میسی رواں سال اسپین کے دوسرے فٹبال کلب کے اکثریتی مالک بن گئے ہیں۔ اس سے قبل اپریل میں انہوں نے یو ای کورنیلا خرید لیا تھا۔

میسی، جو اس وقت انٹر میامی کی نمائندگی کر رہے ہیں، نے گزشتہ ماہ کولمبیا کے سرمایہ کاری گروپ سے ایلڈینسے کے تمام شیئرز خریدنے پر اتفاق کیا تھا۔ یہ گروپ کلب کا سابق اکثریتی شیئر ہولڈر تھا۔

1921 میں قائم ہونے والے ایلڈینسے نے اپنی ویب سائٹ پر کہا کہ لیونل میسی کی جانب سے کلب کی خریداری اس کی 100 سال سے زائد تاریخ میں ایک نئے اور دلچسپ باب کا آغاز ہے۔

ایلڈینسے کو امید ہے کہ اس معاہدے سے ٹیم کی کارکردگی میں بہتری آئے گی، جو سیگنڈا ڈویژن میں سات میچوں میں چار شکستوں کے ساتھ 19ویں نمبر پر ہے اور ریلیگیشن سے بچنے کی کوشش کر رہی ہے۔