وفاقی چیمبر کا حکومت سے بجلی کے ٹیرف میں کمی کا مطالبہ

فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے صدر عاطف اکرام شیخ نے کہا ہے کہ ملک میں کاروبار کرنے کی لاگت خطے کے دیگر ممالک کے مقابلے میں 30 سے 35 فیصد زیادہ ہے۔

انہوں نے کہا کہ برآمدات میں اضافے اور علاقائی و عالمی سطح پر کاروباری لاگت کو مسابقتی بنانے کے لیے بجلی کا ٹیرف 11 سینٹ سے کم کرکے 7 سینٹ کیا جانا چاہیے۔

انہوں نے مزید کہا کہ گیس کا ٹیرف 14 سینٹ ہے، جسے کم کرکے 9 سینٹ کیا جانا چاہیے۔ کاروباری اداروں پر مجموعی ٹیکس 65 فیصد تک ہیں، جنہیں کم کرکے 35 فیصد کیا جانا چاہیے۔

عاطف اکرام شیخ نے اس بات کا اعادہ کیا کہ شرح سود 9.5 فیصد مقرر کی جائے اور بتدریج کم کرکے 6 فیصد تک لائی جائے۔

انہوں نے مزید کہا کہ پٹرول کی قیمتوں پر عائد لیوی بھی کم کی جانی چاہیے جبکہ متبادل ذرائع کی جانب منتقلی کے لیے الیکٹرک گاڑیوں (ای وی) اور بیٹریوں پر عائد ٹیکس ختم کیے جانے چاہئیں۔

ایف پی سی سی آئی کے ریجنل چیئرمین اور نائب صدر ذکی اعجاز نے کہا کہ صنعتی اسٹیٹس کے اطراف موجود سڑکوں کو دو رویہ شاہراہوں میں تبدیل کیا جانا چاہیے۔