امارات ایئرلائن نے کرپٹو کرنسی کے ذریعے فلائٹ بکنگ کی اجازت دے دی
- یہ سہولت فی الحال متحدہ عرب امارات کے اہل رہائشیوں کے لیے دستیاب ہوگی
دنیا کی بڑی فضائی کمپنیوں میں شامل امارات ایئرلائن نے باضابطہ طور پر کرپٹو ادائیگی سروس متعارف کرا دی ہے، جس کے ذریعے صارفین اب ایئرلائن کی ویب سائٹ اور موبائل ایپ پر ڈیجیٹل ادائیگی کر سکیں گے۔
کمپنی کے مطابق کرپٹو اکاؤنٹ رکھنے والے صارفین اب امارات کی ویب سائٹ اور موبائل ایپ پر ٹکٹ بک کرتے وقت ادائیگی کے مرحلے میں کرپٹو ادائیگی کا انتخاب کر سکیں گے۔ تمام لین دین محفوظ طریقے سے اور متحدہ عرب امارات کے ضابطہ کار کے مطابق مکمل کیے جائیں گے۔
یہ سہولت فی الحال متحدہ عرب امارات کے اہل رہائشیوں کے لیے دستیاب ہوگی، جو اماراتی درہم میں قیمت مقرر اور ادائیگی کی جانے والی بکنگز کے لیے استعمال کی جا سکے گی۔
کرپٹو ادائیگی فراہم کرنے والی کمپنی مختلف مالیاتی خدمات پیش کرتی ہے، جن میں ڈیجیٹل کرنسی ایکسچینج، موبائل ایپ اور ڈی سینٹرلائزڈ فنانس والیٹ شامل ہیں۔ کمپنی کے مطابق اس کے صارفین کی تعداد دنیا بھر میں 100 ملین سے زائد ہے۔
امارات کے مطابق یہ سہولت دبئی میں قائم ادارے کے ذریعے فراہم کی جا رہی ہے، جو متحدہ عرب امارات کے مرکزی بینک سے ورچوئل اثاثہ خدمات کے لیے لائسنس حاصل کر چکا ہے۔
یہ اقدام امارات ایئرلائن اور کرپٹو ادائیگی فراہم کرنے والی کمپنی کے درمیان 2025 میں اعلان کردہ شراکت داری پر عملدرآمد کا حصہ ہے۔
امارات کے ڈپٹی پریذیڈنٹ اور چیف کمرشل آفیسر عدنان کاظم نے کہا کہ اس اقدام کا مقصد صارفین کو سفری ادائیگیوں کے لیے مزید سہولت اور انتخاب فراہم کرنا ہے، جبکہ نئی ڈیجیٹل نسل کی بدلتی ترجیحات کو بھی مدنظر رکھا گیا ہے۔
کرپٹو ادائیگی کمپنی کے صدر اور چیف آپریٹنگ آفیسر ایرک انزیانی نے کہا کہ امارات کے ساتھ شراکت داری ڈیجیٹل ادائیگیوں کے شعبے میں ایک اہم پیش رفت ہے اور یہ متحدہ عرب امارات کے جدت پر مبنی وژن کی عکاسی کرتی ہے۔
صارفین موبائل پر بکنگ کے دوران ڈیجیٹل والیٹ کے ذریعے ادائیگی مکمل کر سکیں گے، جبکہ ڈیسک ٹاپ صارفین کیو آر کوڈ اسکین کرکے ادائیگی کی تصدیق کر سکیں گے۔