پاکستان اور ماریشس کا دوطرفہ تجارت کو فروغ دینے پر اتفاق

پاکستان اور ماریشس نے دوطرفہ تجارت اور سرمایہ کاری کے تعلقات کو مضبوط بنانے کے اپنے عزم کا اعادہ کیا ہے۔ دونوں ممالک کے حکام نے پیر کو ہونے والے اجلاس میں اقتصادی تعاون کو مزید فروغ دینے کے مختلف امکانات پر تبادلہ خیال کیا۔

وزیراعظم کے کوآرڈینیٹر برائے تجارت رانا احسان افضل خان نے جمہوریہ ماریشس کے سفیر مروین این چیڈمبرم سے ملاقات کی جس میں دونوں ممالک کے درمیان دوطرفہ تجارت، سرمایہ کاری اور اقتصادی تعاون کو مضبوط بنانے کے طریقوں پر تبادلہ خیال کیا گیا۔

ملاقات کے دوران دونوں فریقین نے دوطرفہ تعلقات کی موجودہ صورتحال کا جائزہ لیا اور تجارتی روابط کو وسعت دینے کیلئے نئے مواقع تلاش کیے۔

بات چیت کا محور تجارتی تعلقات کو بہتر بنانے، سرمایہ کاری کو فروغ دینے اور پاکستان اور ماریشس کے درمیان مضبوط اقتصادی روابط استوار کرنے پر رہا۔

رانا احسان افضل خان نے دونوں ممالک کے نجی شعبوں کے درمیان قریبی تعاون کی اہمیت پر زور دیا اور تجارت اور سرمایہ کاری کے نئے مواقع تلاش کرنے کے لیے بزنس ٹو بزنس (بی ٹو بی) روابط کے کردار کو اجاگر کیا۔

دونوں فریقین نے ادارہ جاتی تعاون کو وسعت دینے، تجارتی روابط کو مزید آسان بنانے اور باہمی طور پر فائدہ مند شراکت داری کے لیے نئے ابھرتے شعبوں کی نشاندہی پر بھی تبادلہ خیال کیا۔

پاکستان اور ماریشس دونوں نے دوطرفہ تعلقات کے مثبت رخ پر اطمینان کا اظہار کیا اور مشترکہ خوشحالی کے مفاد میں باقاعدہ بات چیت کو برقرار رکھنے اور اقتصادی تعاون کو مضبوط بنانے کے اپنے عزم کا اعادہ کیا۔

اجلاس کا اختتام دونوں دوست ممالک کے درمیان تجارتی تعلقات کو گہرا کرنے، کاروباری روابط کو بڑھانے اور اقتصادی تعاون کی نئی راہیں تلاش کرنے کے عزم کے ساتھ ہوا۔