سردار آزمون کی ورلڈ کپ اسکواڈ میں شمولیت کا منصوبہ، ایرانی فٹبال چیف لاعلم

ایرانی فٹبال فیڈریشن کے سربراہ مہدی تاج نے جمعرات کو کہا ہے کہ انہیں اس بات کا علم نہیں کہ اسٹرائیکر سردار آزمون کو ایران کے ورلڈ کپ اسکواڈ میں شامل کرنے کے لیے کوئی منصوبہ بنایا گیا ہے حالانکہ اسلامی جمہوریہ کے ایک نائب صدر کی جانب سے ان کی واپسی کی اپیل کی گئی تھی۔

91 بین الاقوامی میچوں میں 57 گول اسکور کرنے والے سردار آزمون کو کوچ امیر قلعہ نوئی کے ابتدائی اسکواڈ سے باہر کردیا گیا تھا جبکہ مقامی میڈیا رپورٹس میں یہ دعویٰ کیا گیا ہے کہ انہیں حکومت کے ساتھ وفاداری نہ نبھانے کی وجہ سے اسکواڈ سے خارج کیا گیا۔

31 سالہ اسٹرائیکر نے گزشتہ ہفتے اپنی حب الوطنی کا جذباتی اعلان کیا جس کے بعد پیر کو نائب صدر عبدالکریم حسین زادہ کی جانب سے ان کی واپسی کی اپیل سامنے آئی۔

عبدالکریم حسین زادہ نے ایکس پر لکھا کہ اگر ممکن ہو تو ہمیں انہیں قومی ٹیم میں واپس لانا چاہیے۔

مہدی تاج نے جمعرات کو ایرانی ٹی وی سے گفتگو کرتے ہوئے کہا کہ انہیں آزمون کو اسکواڈ میں شامل کیے جانے کے حوالے سے کوئی علم نہیں۔ انہوں نے مزید کہا کہ اس معاملے پر مناسب بات چیت کے ذریعے غور کیا جائے گا، جہاں تک سردار آزمون کا تعلق ہے میں فی الحال ان کی صورتحال سے باخبر نہیں ہوں۔

ایران میں میڈیا رپورٹس کے مطابق سردار آزمون نے اس وقت حکومتی حامیوں کو ناراض کردیا جب انہوں نے امریکہ اور اسرائیل کی جانب سے ایران پر فضائی حملوں کے فوراً بعد دبئی کے حکمران محمد بن راشد آل مکتوم کے ساتھ ملاقات کی ایک تصویر سوشل میڈیا پر شیئر کی۔