انٹربینک مارکیٹ میں منگل کو ڈالر کے مقابلے روپے کی قدر میں اضافہ ریکارڈ کیا گیا۔
کاروبار کے اختتام پر ڈالر کے مقابلے میں روپیہ ایک پیسے کی بہتری سے 278.75 روپے پر بند ہوا۔
یاد رہے کہ پیر کو ڈالر 278.76 روپے پر بند ہوا تھا۔
عالمی سطح پر منگل کو جاپانی ین کی قدر میں استحکام رہا۔ پیر کے روز خلیج میں امریکہ اور ایران کے تازہ حملوں نے مارکیٹوں میں بے چینی پیدا کر دی، جس سے نازک جنگ بندی شدید دباؤ کا شکار ہوئی اور سرمایہ کاروں میں مندی کا رجحان رہا۔ ان حالات نے ڈالر کی قدر میں اضافہ کیا، جبکہ یورو اپنی گزشتہ گراوٹ برقرار رکھتے ہوئے 1.1693 ڈالر پر رہا اور پاؤنڈ اسٹرلنگ 1.353 ڈالر پر ٹریڈ ہوا۔ چھ عالمی کرنسیوں کے مقابلے میں ڈالر کا انڈیکس 0.3 فیصد اضافے کے بعد 98.452 پر مستحکم رہا۔
مزید برآں گزشتہ سیشن میں 6 فیصد تک اضافے کے بعد منگل کو تیل کی قیمتوں میں ایک فیصد سے زائد کی کمی دیکھی گئی۔ جولائی کے لیے برینٹ کروڈ کے سودے 1.22 ڈالر یا 1.1 فیصد کمی کے بعد 113.22 ڈالر فی بیرل پر آگئے، جبکہ امریکی ویسٹ ٹیکساس انٹرمیڈیٹ (ڈبلیوٹی آئی) کی قیمت 2.02 ڈالر یا 1.9 فیصد کی کمی کے بعد 104.40 ڈالر فی بیرل ریکارڈ کی گئی۔