الینا ریباکینا کا سال 2026 کا شاندار آغاز برقرار

ٹاپ سیڈ الینا ریباکینا نے اپنی شاندار فارم کو برقرار رکھتے ہوئے ہفتے کے روز چھٹی سیڈ میرا اینڈریوا کو 5-7، 1-6 سے شکست دے کر پورشے ٹینس گرینڈ پری کے فائنل میں جگہ بنا لی۔ قازقستان کی نمائندگی کرنے والی ریباکینا کا اتوار کو فائنل میں مقابلہ جمہوریہ چیک کی ساتویں سیڈ کیرولینا موچووا سے ہوگا، جنہوں نے یوکرین کی چوتھی سیڈ ایلینا سویتولینا کو ایک سخت مقابلے کے بعد 4-6، 6-2، 4-6 سے ہرا کر اپ سیٹ کامیابی حاصل کی۔

ریباکینا، جو 2026 کا آسٹریلین اوپن جیت چکی ہیں، پہلے سیٹ میں اینڈریوا کی سروس توڑ کر برتری حاصل کی اور دوسرے سیٹ میں مکمل طور پر حاوی رہیں۔ دوسری جانب موچووا اور سویتولینا کے درمیان فیصلہ کن سیٹ نہایت دلچسپ رہا، لیکن چیک کھلاڑی نے آخری آٹھ پوائنٹس لگاتار جیت کر میچ اپنے نام کر لیا۔ موچووا اور ریباکینا اب چوتھی بار ایک دوسرے کے مدِ مقابل ہوں گی، اس سے قبل ہونے والے تین میچوں میں موچووا کو دو ایک کی برتری حاصل ہے۔

روئن میٹروپولیٹن اوپن، فرانس:

یوکرین کی ٹاپ سیڈ مارٹا کوسٹیوک نے جرمنی کی تاتیانا ماریا کو یکطرفہ مقابلے کے بعد 3-6، 0-6 سے ہرا کر روئن اوپن کے فائنل میں رسائی حاصل کر لی۔ فائنل میں کوسٹیوک کا مقابلہ اپنی ہی ہم وطن 19 سالہ کوالیفائر ویرونیکا پوڈریز سے ہوگا، جنہیں رومانیہ کی سونیا کرسٹیا کے انجری کے باعث دستبردار ہونے پر واک اوور مل گیا۔

کوسٹیوک، جو 2023 کے بعد اپنے دوسرے ڈبلیو ٹی اے ٹائٹل کی تلاش میں ہیں نے جرمن کھلاڑی کے خلاف بہترین کھیل کا مظاہرہ کیا۔ 19 سالہ پوڈریز نے فائنل تک پہنچنے کے سفر میں سلوین اسٹیفنز، الزبیٹا کوچیاریٹو اور کیٹی بولٹر جیسی بڑی کھلاڑیوں کو شکست دے کر سب کو متاثر کیا ہے۔