نیشنل سیونگز اسکیم، سی ڈی این ایس نے زیادہ تر اسکیمز پر شرح منافع کم کردی

مرکزی ڈائریکٹوریٹ آف نیشنل سیونگز(سی ڈی این ایس) نے زیادہ تر نیشنل سیونگز اسکیمز پر منافع کی شرح میں کمی کر دی، جو 5 جنوری 2026 سے نافذ العمل ہے۔

عارف حبیب لمیٹڈ کے اعداد و شمار کے مطابق جمعہ کو جاری کردہ رپورٹ میں بتایا گیا کہ اسپیشل سیونگز سرٹیفیکیٹس (ایس ایس سی) کی شرح منافع 40 بیس پوائنٹس کم کر کے 10.20 فیصد کر دی گئی، جبکہ ریگولر انکم سرٹیفیکیٹس کی شرح 36 بیس پوائنٹس کمی کے بعد 10.56 فیصد رہ گئی۔ اسی طرح سیونگز اکاؤنٹ کی شرح 50 بیس پوائنٹس کم کر کے 9.00 فیصد ہو گئی، جو اسکیمز میں سب سے بڑی کمیوں میں سے ایک ہے۔

پنشنرز بینیفٹ اکاؤنٹ، بہبود سیونگز سرٹیفیکیٹ اور شہدا فیملی ویلفیئر اکاؤنٹ کی شرح میں بھی 24 بیس پوائنٹس کمی کی گئی اور یہ 12.48 فیصد سے 12.72 فیصد پر پہنچ گئی، جبکہ ڈیفنس سیونگز سرٹیفیکیٹ کی شرح 23 بیس پوائنٹس کمی کے بعد 11.08 فیصد ہو گئی۔

دوسری جانب اسلامی سیونگز مصنوعات میں الٹا رجحان دیکھا گیا۔ سروہ اسلامی ٹرم اکاؤنٹ کی شرح 4 بیس پوائنٹس اضافہ کے بعد 9.96 فیصد ہو گئی، اور سروہ اسلامی سیونگز اکاؤنٹ کی شرح بھی 4 بیس پوائنٹس بڑھ کر 9.96 فیصد ہو گئی، جو نظرثانی کے بعد زیادہ منافع دینے والے چند آلات میں شامل ہے۔

مارکیٹ کے شرکا اس مجموعی کمی کو اس توقع کے مطابق دیکھ رہے ہیں کہ اہم شرح سود میں بتدریج کمی آئے گی، کیونکہ مہنگائی میں اعتدال اور معاشی اشاریوں میں بہتری دیکھی جا رہی ہے۔

گزشتہ ماہ مارکیٹ کی توقعات کے برعکس، اسٹیٹ بینک آف پاکستان کی مانیٹری پالیسی کمیٹی نے پالیسی ریٹ میں 50 بیس پوائنٹس کمی کر کے اسے 10.5 فیصد کر دیا تھا۔

نیشنل سیونگز آرگنائزیشن پاکستان کا سب سے بڑا مالیاتی ادارہ ہے، جو 3.4 ٹریلین روپے سے زائد کا پورٹ فولیو منیج کرتا ہے اور ملک بھر میں 376 شاخوں کے ذریعے 40 لاکھ سے زائد صارفین کی خدمت فراہم کرتا ہے، جسے 12 ریجنل ڈائریکٹوریٹس کے تحت چلایا جاتا ہے۔

مرکزی ڈائریکٹوریٹ آف نیشنل سیونگز حکومت کو بجٹ خسارے کی مالی اعانت اور اہم بنیادی ڈھانچے کے منصوبوں کی حمایت میں مدد فراہم کرتا ہے۔