مشرق بینک نے پاکستان میں کرنٹ اکاؤنٹس پر پہلی بار منافع متعارف کروا دیا

مشرق بینک پاکستان، جو ملک میں کام کرنے والے دو ریٹیل ڈیجیٹل بینکوں میں سے ایک ہے، نے پاکستان میں بیرونِ ملک سے ورکرز کی ترسیلاتِ زر لانے پر خصوصی توجہ مرکوز کرتے ہوئے پہلی بار کرنٹ اکاؤنٹس پر منافع متعارف کرا دیا ہے۔

بینک کے مطابق کرنٹ اکاؤنٹس پر سالانہ 5 فیصد تک منافع پیش کیا جائے گا۔

مشرق پاکستان کے ہیڈ آف اسلامک بینکنگ شہزاد کھوکھر نے پیر کو ’’مشرق نیو‘‘، جو پاکستان کے لیے تیار کیا گیا بینک کا جدت پر مبنی ڈیجیٹل بینکنگ پلیٹ فارم ہے، کے اجراء کے موقع پر کہا کہ “مشرق نیو نے شریعت کے مطابق منافع بخش کرنٹ اکاؤنٹ متعارف کرا دیا ہے، جس میں صارفین کے لیے سالانہ 5 فیصد تک کا مارکیٹ میں اپنی نوعیت کا پہلا منافع فراہم کیا جا رہا ہے، جب کہ اسلامی سیونگز اکاؤنٹ پر 10 فیصد تک بہترین منافع کی پیشکش ہے، اور روایتی کھاتوں پر بھی مسابقتی شرحیں دی جا رہی ہیں۔”

دبئی میں قائم اپنے مرکزی دفتر کے ساتھ، بینک کا ہدف ہے کہ اگلے پانچ برسوں میں ایک کروڑ پاکستانیوں کو خدمات فراہم کرے، کیونکہ اس کا دعویٰ ہے کہ وہ ملک میں دوسرا بڑا واحد غیر ملکی براہِ راست سرمایہ کار (ایف ڈی آئی ) ہے، جس نے پچھلے چند برسوں میں پاکستان میں کل 10 کروڑ ڈالر کی سرمایہ کاری کی ہے۔

بینک ترسیلات زر کے ذریعے بظاہر کھاتے داروں اور دیگر افراد سے ڈپازٹس کے حصول کو متحرک بنانا چاہتا ہے اور 2026 سے افراد اور چھوٹے و درمیانے درجے کے کاروباری اداروں ( ایس ایم ایز ) کو قرض کی سہولت فراہم کرنے کا آغاز کرے گا۔

مشرق بینک اپنی عالمی بینکاری ڈھانچے سے فائدہ اٹھاتے ہوئے یو اے ای میں مقیم پاکستانیوں (جو پاکستان میں مستقل رہائش نہیں رکھتے) کے لیے فوری بینک اکاؤنٹ کھولنے کی سہولت فراہم کرے گا، جس سے ترسیلاتِ زر تیز رفتار اور بغیر فیس کے ممکن ہوں گی۔

بینک کے چیف ایگزیکٹو آفیسر محمد ہمایوں سجاد کے مطابق، مشرق یو اے ای کے ذریعے پہلے ہی “تقریباً 3 لاکھ پاکستانی شہری” وہاں سے پاکستان رقوم بھیج رہے ہیں۔

انہوں نے نوٹ کیا کہ پاکستان کی مجموعی ترسیلات زر مالی سال 2024-25 میں ریکارڈ 38 ارب ڈالر تک پہنچ گئیں، جبکہ دو سال قبل یہ تقریباً 28 ارب ڈالر تھیں۔

انہوں نے کہا کہ “یہ ورکرز کی ترسیلات زر ملکی جی ڈی پی میں 10 فیصد کا حصہ رکھتی ہیں، اور واضح طور پر یہ وہ زندگی کی رَاہ ہیں جس کی ہماری قوم منتظر رہتی ہے۔”

مشرق بینک پاکستان کے چیئرمین اور مشرق بینک کے گروپ ہیڈ آف ریٹیل بینکنگ فرنانڈو مورِیلو نے کہا کہ “ہم نے 100 ملین ڈالر سے زائد سرمایہ کاری کی ہے۔ یہ مشرق بینک کے لیے پاکستان میں گزشتہ چند سال کی سب سے اہم سرمایہ کاری ہے۔”

دریں اثناء تقریب کے موقع پر بزنس ریکارڈر سے بات کرتے ہوئے مشرق بینک کے سی ای او محمد ہمایوں سجاد نے کہا کہ بینک کا ہدف ہے کہ 2026 کے وسط سے ایس ایم ای بینکنگ شروع کی جائے اور دسمبر 2026 تک افراد کو قرض فراہم کرنا شروع کیا جائے۔

انہوں نے مزید کہا کہ بینک مستقبل میں پاکستان میں کیش وصول کرنے والے خودکار ٹیلر مشینیں (اے ٹی ایمز ) نصب کرنے کی منصوبہ بندی کر رہا ہے۔

مشرق بینک پاکستان نے اپنی تجارتی سرگرمیاں ستمبر 2025 کے وسط میں شروع کی ہیں۔