وزیراعظم شہباز شریف نے کہا کہ پاکستان بنگلہ دیش کے ساتھ تجارتی تعلقات اور عوامی رابطوں کو مزید فروغ دینے کا خواہاں ہے۔
یہ بات وزیراعظم نے اسلام آباد میں بنگلہ دیش کے ہائی کمشنر اقبال حسین خان سے ملاقات کے دوران کہی۔
ملاقات کے دوران وزیراعظم نے مختلف شعبوں میں پاکستان اور بنگلہ دیش کے درمیان بڑھتے ہوئے تعلقات پر اطمینان کا اظہار کیا۔
انہوں نے بنگلہ دیش کے چیف ایڈوائزر ڈاکٹر محمد یونس کے ساتھ اپنے خوشگوار اور نتیجہ خیز روابط کو یاد کیا، جن میں دسمبر 2025 میں ڈی-8 سمٹ کے موقع پر قاہرہ میں ان کی آخری ملاقات بھی شامل تھی، اور دونوں فریقین کے درمیان مختلف دوطرفہ میکانزم کی بحالی پر اطمینان ظاہر کیا۔
وزیراعظم نے اس رفتار کو برقرار رکھنے کی اہمیت پر زور دیا تاکہ دونوں ممالک کے دوطرفہ تعلقات کو مزید مستحکم کیا جا سکے، اور سیاسی، اقتصادی و ثقافتی شعبوں میں تعاون کو بڑھانے کی ضرورت پر بھی روشنی ڈالی۔
دونوں ممالک کی قیادت کی خواہش کے پیش نظر، بنگلہ دیش کے ہائی کمشنر نے وزیراعظم کو سفر، تجارت اور رابطہ کاری کے شعبے میں اٹھائے جانے والے اقدامات سے آگاہ کیا اور پاکستان و بنگلہ دیش کے تاریخی دوستانہ تعلقات کو مزید مضبوط بنانے کے لیے اپنی مسلسل کوششوں کا بھی اظہار کیا۔