پاکستان اور برطانیہ نے دفاعی شعبے میں تعاون بڑھانے پر اتفاق کرتے ہوئے دوطرفہ تعلقات کو مزید مضبوط بنانے کے عزم کا اعادہ کیا ہے۔
یہ پیشرفت راولپنڈی میں برطانوی ہائی کمشنر جین میریٹ اور وفاقی وزیر برائے دفاعی پیداوار محمد رضا حیات ہراج کے درمیان اعلیٰ سطح ملاقات کے دوران ہوئی۔
ملاقات کے دوران وفاقی وزیر نے کہا کہ پاکستان برطانیہ کو قریبی دوست اور حقیقی ترقیاتی شراکت دار سمجھتا ہے۔
انہوں نے اس بات کی نشاندہی کی کہ باہمی روابط میں تسلسل ، علاقائی اور عالمی امور پر مؤقف میں ہم آہنگی پیدا کرنے میں معاون ثابت ہوا ہے۔ بیان کے مطابق دونوں فریقین نے دفاع سمیت تمام شعبوں میں تعاون بڑھانے پر اتفاق کیا۔
برطانوی ہائی کمشنر نے بھی پاکستان اور برطانیہ کے تعلقات کو مزید مضبوط بنانے اور باہمی ترجیحات— بشمول دوطرفہ تجارت اور دفاعی پیداوار — پر پاکستان کے ساتھ مل کر کام کرنے کے عزم کا اظہار کیا۔
دریں اثنا محمد رضا حیات ہراج نے اس امید کا اظہار کیا کہ پاکستان اور برطانیہ کے دوطرفہ تعلقات باہمی مفادات کے اصولوں پر مبنی بنیادوں پر مسلسل فروغ پاتے رہیں گے۔
گزشتہ ماہ برطانیہ اور پاکستان کے وزراء نے دونوں ممالک کے درمیان تجارت کو فروغ دینے کے لیے نئے اقدامات کا اعلان کیا جو یوکے-پاکستان ٹریڈ ڈائیلاگ کے آغاز کے بعد سامنے آئے۔
وزراء نے ایک نئے یوکے-پاکستان بزنس ایڈوائزری کونسل کے قیام کا اعلان کیا جو سینئر کاروباری رہنماؤں اور سرکاری حکام کو یکجا کرے گی تاکہ اعلیٰ قدر کی تجارت اور سرمایہ کاری کو فروغ دیا جاسکے۔
یہ کونسل پالیسی اصلاحات سے متعلق اسٹریٹجک رہنمائی فراہم کرے گی، خفیہ مشاورت کا مؤثر فورم مہیا کرے گی اور مارکیٹ تک رسائی میں درپیش رکاوٹوں کے حل اور عالمی بہترین طریقوں کے تبادلے کے ذریعے تجارتی و سرمایہ کاری مواقع کے فروغ میں کلیدی کردار ادا کرے گی۔
برطانیہ نے پاکستان کی برطانوی سرمایہ کاری کے حصول کی خواہشات کو فروغ دینے کے لیے 2 لاکھ پاؤنڈ (تقریباً 7 کروڑ روپے) تک کی امداد کا اعلان کیا ہے۔ یہ فنڈز سرمایہ کاروں سے روابط بڑھانے کے لیے تکنیکی معاونت فراہم کریں گے اور پاکستانی سرمایہ کاروں اور برطانیہ میں موجود مواقع کے درمیان شراکت داری کو فروغ دینے میں مدد دیں گے۔
اس وقت پاکستان اور برطانیہ کے درمیان دو طرفہ تجارت کا حجم 4.7 ارب پاؤنڈ ہے۔