پاکستان بھر میں شدید موسلا دھار بارشوں نے تباہی مچا دی ہے۔ نیشنل ڈیزاسٹر مینجمنٹ اتھارٹی (این ڈی ایم اے) نے 26 جون سے اب تک 178 افراد کی اموات اور 491 زخمیوں کی افسوسناک خبر دی ہے جبکہ مختلف شہروں میں سیلاب کے امکانات کی وارننگ بھی جاری کی گئی ہے۔
این ڈی ایم اے کے تازہ اعداد و شمار کے مطابق گزشتہ 24 گھنٹوں میں بارشوں کے باعث حادثات میں 54 افراد جاں بحق اور 227 زخمی ہوئے ہیں۔ انسانی جانوں کے نقصان کے علاوہ 678 مکانات کو نقصان پہنچا ہے اور 126 مویشی بھی ہلاک ہو چکے ہیں۔
26 جون سے صوبہ وار اموات کی تفصیل یہ ہے کہ پنجاب 103، خیبر پختونخوا 38، سندھ 20، بلوچستان 16 اور آزاد جموں و کشمیر میں ایک موت ہوئی ہے۔
این ڈی ایم اے نے تصدیق کی ہے کہ تمام واقعات شدید موسلا دھار بارشوں کا براہِ راست نتیجہ ہیں۔ متعلقہ حکام صورتحال کا مسلسل جائزہ لے رہے ہیں اور متاثرہ علاقوں میں ریلیف آپریشن جاری ہیں۔
دریں اثنا این ڈی ایم اے نے آئندہ 24 گھنٹوں میں متوقع شدید بارشوں کے پیش نظر مختلف علاقوں میں شہری سیلاب اور ندی نالوں میں پانی کی سطح بلند ہونے کی وارننگ دی ہے۔
عوام کو ہدایت کی گئی ہے کہ وہ سرکاری ذرائع بشمول ’پاک این ڈی ایم اے ڈیزاسٹر الرٹ ایپ‘ کے ذریعے معلومات حاصل کرتے رہیں۔
این ڈی ایم اے کے ترجمان نے بتایا ہے کہ ادارہ اور متعلقہ محکمے کسی بھی ہنگامی صورتحال سے نمٹنے کے لیے پیشگی اقدامات کر رہے ہیں۔
اتھارٹی نے عوام سے سخت احتیاط برتنے کی اپیل کی ہے۔ شہریوں کو ہدایت دی گئی ہے کہ وہ نالے، پل اور زیر آب سڑکوں سے گزرنے سے گریز کریں اورنشیبی علاقوں کے رہائشی اپنے قیمتی سامان اور مویشیوں کو محفوظ مقام پر منتقل کریں۔
خطرے سے ممکنہ طور پر دوچار ہونے والے علاقوں کے باشندوں کو تین سے پانچ دن کے لیے خوراک، پانی اور دواؤں کا ایمرجنسی کٹ تیار رکھنے کی ہدایت دی گئی ہے۔
مقامی انتظامیہ کو ہدایت دی گئی ہے کہ نکاسی آب کے آلات تیار رکھیں، اور شہریوں کو ٹیلویژن اور موبائل چینلز پر جاری سرکاری انتباہات سے باخبر رہنے کی تلقین کی گئی ہے۔
اطلاع کے مطابق راولپنڈی اور اسلام آباد میں آئندہ 24 سے 48 گھنٹوں کے دوران وقفے وقفے سے شدید بارش کا امکان ہے۔
این ڈی ایم اے نے خبردار کیا ہے کہ شدید بارشوں کے باعث نالہ لَی میں طغیانی کا خطرہ ہے، جو نشیبی علاقوں میں سنگین سیلابی صورتحال پیدا کر سکتا ہے۔
ڈیزاسٹر مینجمنٹ اتھارٹی نے راولپنڈی اور اسلام آباد کے رہائشیوں، خصوصاً نالہ لَی کے اطراف آباد افراد کو محتاط رہنے، احتیاطی تدابیر اختیار کرنے اور ہنگامی صورتِ حال میں، سائرن بجنے کی صورت میں، فوری طور پر خطرناک مقامات سے انخلا کی ہدایت دی ہے۔ شہریوں پر زور دیا گیا ہے کہ وہ کسی بھی ہنگامی کارروائی کے دوران متعلقہ اداروں سے مکمل تعاون کریں۔
پنجاب کے کئی اضلاع میں آئندہ 12 گھنٹوں کے دوران شدید بارش، آندھی اور گرج چمک کے ساتھ طوفانی ہواؤں کا قوی امکان ہے۔ ان اضلاع میں لاہور، چکوال، اٹک، جہلم، خوشاب، سرگودھا، گجرات، گوجرانوالہ، فیصل آباد، سیالکوٹ، نارووال، اوکاڑہ، قصور، شیخوپورہ اور حافظ آباد شامل ہیں۔
این ڈی ایم اے نے تمام متعلقہ اداروں کو ہدایت دی ہے کہ وہ ممکنہ ہنگامی صورتحال سے نمٹنے کے لیے پیشگی انتظامات کو یقینی بنائیں۔