پاکستان ریفائنری کو اہم توسیعی منصوبے ای پی سی ایف کیلئے بولیاں موصول

پاکستان ریفائنری لمیٹڈ (پی آر ایل) نے اپنے ریفائنری ایکسپنشن اور اپ گریڈ پروجیکٹ کیلئے انجینئرنگ، پروکیورمنٹ، کنسٹرکشن اور فنانسنگ (ای پی سی ایف) کے کام انجام دینے کی خواہش رکھنے والی کمپنیوں سے باضابطہ بولیاں موصول کرلی ہیں۔

ریفائنری نے اس پیش رفت سے پیر کو اسٹاک ایکسچینج کو ایک نوٹس کے ذریعے آگاہ کیا۔

نوٹس کے مطابق پاکستان ریفائنری لمیٹڈ کو اپنے ریفائنری ایکسپنشن اور اپ گریڈ پروجیکٹ کیلئے انجینئرنگ، پروکیورمنٹ، کنسٹرکشن اور فنانسنگ کی بولیاں موصول ہوچکی ہیں۔ پی آر ایل ان بولیوں کے جائزے کے عمل میں ہے اور ضرورت پڑنے پر مناسب وقت پر مزید اپ ڈیٹس فراہم کرے گا۔

ریفائنری دو مقامات پر کام کرتی ہے، جہاں اس کا مرکزی سہولت کورنگی کریک میں واقع ہے جبکہ خام تیل کی براجمانی اور ذخیرہ اندوزی کی سہولت کیماڑی میں موجود ہے۔

تقریباً 1.7 ارب ڈالر کی لاگت سے پاکستان ریفائنری لمیٹڈ ریفائنری ایکسپینشن اینڈ اپگریڈ پروجیکٹ کی قیادت کررہا ہے جس کا مقصد موجودہ 50 ہزار بیرل یومیہ خام تیل کی پروسیسنگ صلاحیت کو دگنا کرکے ایک لاکھ بیرل یومیہ تک پہنچانا ہے اور مالیاتی اختتام کے 5 سال بعد ہائی سلفر فرنس آئل کی پیداوار کو مکمل طور پر ختم کرنا ہے۔

یہ منصوبہ زیرو فرنس آئل کی پیداوار حاصل کرنے کے لیے تیار کیا گیا ہے، جس کے تحت زیادہ منافع بخش مصنوعات جیسے پٹرول اور ڈیزل کی یورو 5 معیار تک زیادہ سے زیادہ پیداوار پر توجہ مرکوز کی جائے گی۔