ڈالر کے مقابلے میں روپے کی قدر 17 ماہ کی کم ترین سطح پر آگئی

انٹربینک مارکیٹ میں جمعرات کے کاروباری روز امریکی ڈالر کے مقابلے میں پاکستانی روپے کی قدر میں مزید 0.03 فیصد کی کمی واقع ہوئی ہے جس کے بعد روپیہ ڈالر کے مقابلے میں 17 ماہ کی کم ترین سطح پر آگیا۔

کاروبار کے اختتام پر ڈالر کے مقابلے میں قدر 9 پیسے کم ہونے کے بعد روپیہ 282 روپے 6 پیسے پر بند ہوا۔

یاد رہے کہ بدھ کو ڈالر281.97 روپے پر بند ہوا تھا۔

اس سے قبل 27 دسمبر 2023 کو روپیہ امریکی ڈالر کے مقابلے میں 282 کی سطح پر ریکارڈ کیا گیا تھا۔

بروکریج ہاؤس عارف حبیب لمیٹڈ میں ہیڈ آف ریسرچ ثنا توفیق کا کہنا ہے کہ درآمدی مانگ میں اضافے نے کرنسی پر دباؤ ڈال دیا ہے۔

بین الاقوامی منڈیوں میں امریکی مالیاتی غیریقینی صورتحال اور خزانے کے بانڈز کی کمزور نیلامی کے باعث جمعرات کو امریکی ڈالر جاپانی ین کے مقابلے میں دو ہفتوں کی کم ترین سطح پر آگیا جبکہ صدر ڈونلڈ ٹرمپ کانگریس میں اپنے بڑے پیمانے پر اخراجات اور ٹیکس میں کمی کے بل کی منظوری کے لیے سرگرم رہے۔

20 سالہ بانڈز کی کمزور فروخت نے سیل امریکہ کے رجحان کو مزید تقویت دی جس نے نہ صرف امریکی ڈالر بلکہ وال اسٹریٹ پر بھی مندی کا اثر ڈالا کیونکہ تاجروں میں پچھلے ہفتے موڈی کی جانب سے امریکی ٹرپل اے کریڈٹ ریٹنگ کم کیے جانے کے بعد پہلے ہی بے چینی پائی جا رہی تھی۔

بٹ کوائن نے جمعرات کو ایک نئے ریکارڈ سطح کو چھو لیا، جزوی طور پر اس لیے کہ سرمایہ کار امریکی اثاثوں کے متبادل تلاش کر رہے تھے۔ سونا بھی فائدہ اٹھاتے ہوئے تقریباً دو ہفتوں کی بلند ترین قیمت 3,325.79 ڈالر تک پہنچ گیا ہے۔

امریکی ڈالر ایشیا میں 143.27 ین کی سطح تک گر گیا، جو 7 مئی کے بعد سب سے کمزور سطح ہے۔

بٹ کوائن 3.4 فیصد اضافے کے ساتھ ایک لاکھ 11 ہزار کی بلند ترین سطح پر جاپہنچا ہے ۔