صدر آصف علی زرداری نے منگل کے روز کہا کہ بھارت کی کھلی جارحیت نے پاکستانی قوم کو مزید متحد اور مضبوط کیا ہے، اور پوری قوم اور اس کی مسلح افواج بھارت دشمنی کا جواب دینے کے لیے ہمیشہ تیار ہیں ۔ یہ بات ایوان صدر سے جاری ایک بیان میں کہی گئی ہے۔
صدرِ مملکت نے ایک بیان میں پاکستان کے خلاف بھارت کی بلا اشتعال جارحیت کے نتیجے میں شہید ہونے والوں کو خراجِ عقیدت پیش کیا اور کہا کہ پوری قوم پاکستان آرمی اور پاکستان ایئر فورس کے ان بہادر سپوتوں کو سلام پیش کرتی ہے جنہوں نے ملک کے دفاع کے لیے اپنی جانوں کا نذرانہ پیش کیا۔
بیان کے مطابق صدر مملکت نے مزید کہا کہ ہمیں اپنے شہداء کی قربانیوں پر فخر ہے۔ ہماری بہادر افواج نے قوم اور ملک کی سالمیت کا کامیابی سے دفاع کیا ہے۔ آپریشن بنیان مرصوص کے ذریعے ہماری بہادر افواج نے دشمن کے غرور کو خاک میں ملا دیا۔
صدر آصف زرداری نے کہا کہ پاکستان کے عوام اور بہادر افواج ہر قسم کی جارحیت کو ناکام بنانے کے لیے ہر وقت تیار ہیں اور وہ اپنی قومی سلامتی اور خودمختاری پر کسی حملے کا منہ توڑ جواب دیں گے۔
انہوں نے بھارتی حملوں میں بچوں اور خواتین سمیت قیمتی جانوں کے ضیاع پر دکھ اور افسوس کا اظہار کیا۔
انہوں نے شہداء کے اہل خانہ سے تعزیت کا اظہار کرتے ہوئے ان کے لیے صبر و حوصلے کی دعا کی اور زخمیوں کی جلد صحت یابی کیلئے نیک تمناؤں کا بھی اظہار کیا۔