وفاقی وزیر خزانہ محمد محمد اورنگزیب لندن روانہ ہوگئے، جہاں ان کی برطانوی حکومت کے حکام اور کاروباری رہنماؤں کے ساتھ ملاقاتیں طے ہیں۔
وزارت خزانہ کے ایک بیان کے مطابق 3 روزہ دورے کے دوران وزیر خزانہ مختلف سرمایہ کاری فورمز اور سیمینارز سے خطاب کریں گے تاکہ پاکستان کی معیشت کا واضح منظرنامہ پیش کر سکیں۔
بیان کے مطابق محمد اورنگزیب پاکستان ایکسیس ڈے کے عنوان سے جیفریز کی جانب سے منعقد کردہ ایک سرمایہ کاری راؤنڈ ٹیبل میں شرکت کریں گے۔ اس کے علاوہ، وہ برطانوی ٹیک سرمایہ کاروں کے ساتھ اے آئی، کان کنی اور صحت کی دیکھ بھال پر ایک راؤنڈ ٹیبل ڈسکشن میں بھی شریک ہوں گے۔
وزیراعظم کے مشیر برائے سرمایہ کاری محمد علی بھی ان دونوں سیشنز میں محمد اورنگزیب کے ہمراہ ہوں گے۔
دورے کے دوران محمد اورنگزیب وزیر خزانہ لارڈ لیورمور اور دیگر سینئر حکام سے ملاقاتیں کریں گے۔
وہ فارن، کامن ویلتھ اینڈ ڈیولپمنٹ آفس (ایف سی ڈی او) کا بھی دورہ کریں گے اور برطانوی پارلیمانی وزیر مملکت برائے مشرق وسطیٰ، افغانستان اور پاکستان، لیو ڈوچیرٹی اور دیگر اعلیٰ حکام سے ملاقات کریں گے۔
علاوہ ازیں محمد اورنگزیب آفس فار بجٹ رسپانسبیلیٹی (او بی آر) کا دورہ کریں گے اور اس کے چیئرمین رچرڈ ہیوز اور ان کی ٹیم سے ملاقات کریں گے۔
وہ بینک آف انگلینڈ کے صدر دفتر کا بھی دورہ کریں گے اور گورنر اینڈریو بیلی اور ان کی ٹیم سے ملاقات کریں گے۔
علاوہ ازیں ڈوئچے بینک اور اسٹینڈرڈ چارٹرڈ بینک کے سربراہان سے ملاقاتیں بھی ایجنڈے میں شامل ہیں۔
علاوہ ازیں وزیر خزانہ اپنی ٹیم کے ہمراہ یوکے گورنمنٹ کمیونیکیشن سروس کے چیف ایگزیکٹو سائمن باگ سے بھی ملاقات کریں گے۔ وہ کارگل گلوبل ٹریڈنگ یوکے کے سربراہ مارکس ہال اور برٹش امریکن ٹوبیکو کے حکام سے بھی ملاقاتیں کریں گے۔