ٹھٹھہ سیمنٹ کمپنی لمیٹڈ (ٹی ایچ سی سی ایل) نے ایکسچینج کو آگاہ کیا ہے کہ اس کے بورڈ آف ڈائریکٹرز (بی او ڈی) نے شیئر ہولڈرز کی منظوری سے مشروط ایکویٹی حصص کی سب ڈویژن کی تجویز دی ہے۔
جمعہ کو جاری کردہ نوٹس میں کہا گیا کہ بورڈ نے کمپنی کے عام حصص کی سب ڈویژن کی سفارش کی ہے جس کے تحت فی شیئر قیمت 10 روپے سے کم کر کے 2 روپے کر دی جائے گی۔ اس کا مطلب ہے کہ ہر ایک شیئر کے بدلے پانچ نئے شیئرز جاری کیے جائیں گے۔
شیئرز کی یہ تقسیم، جسے اسٹاک اسپلٹ بھی کہا جاتا ہے، ایک ایسا کارپوریٹ اقدام ہے جس کے ذریعے شیئرز کی تعداد بڑھا دی جاتی ہے جبکہ فی شیئر قیمت کم ہو جاتی ہے۔ تاہم کمپنی کی مجموعی قدر اور ہر حصص دار کی سرمایہ کاری کی مالیت میں کوئی تبدیلی نہیں آتی۔
ٹھٹھہ سیمنٹ نے اپنے نوٹس میں بتایا کہ اس اقدام کا بنیادی مقصد چھوٹے اور ریٹیل سرمایہ کاروں کے لیے شیئرز کو مزید قابلِ رسائی اور سستا بنانا ہے تاکہ سرمایہ کاروں کی تعداد میں اضافہ ہو۔
نوٹس میں مزید کہا گیا کہ اس اقدام سے توقع ہے کہ مارکیٹ میں لیکویڈیٹی بڑھے گی اور ٹریڈنگ والیوم میں اضافہ ہوگا۔
یہ فیصلہ کمپنی کی طویل المدتی ترقی پر اعتماد کی بھی عکاسی کرتا ہے، جس کی حمایت گزشتہ برس کے دوران شیئر قیمت میں نمایاں اضافے سے ہوئی ہے۔
مجموعی طور پر، اس اقدام کا مقصد سرمایہ کاروں کی زیادہ شرکت کو فروغ دینا اور ٹھٹہ سیمنٹ کی ایکویٹی مارکیٹ میں موجودگی کو مزید مضبوط کرنا ہے۔
کمپنی نے بتایا کہ اگر یہ تجویز غیر معمولی جنرل میٹنگ میں منظور ہو جاتی ہے، تو اس کے نتیجے میں کمپنی کا موجودہ سبسکرائب شدہ اور ادا شدہ سرمایہ، جو اس وقت 10 روپے مالیت کے 99,718,125 عام شیئرز پر مشتمل ہے، تقسیم ہو کر 2 روپے مالیت کے 498,590,625 عام شیئرز میں تبدیل ہو جائے گا۔
نوٹس کے مطابق اس کے نتیجے میں، اہل حصص داروں کو تعین کی گئی تاریخ پر رکھے گئے ہر 1 شیئر کے بدلے 5 عام شیئرز دیے جائیں گے۔