ڈالر کے مقابلے میں روپے کی قدر میں معمولی کمی

انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 0.03 فیصد کی کمی واقع ہوئی ہے۔

کاروبار کے اختتام پر ڈالر کے مقابلے میں قدر 9 پیسے کم ہونے کے بعد روپیہ 281 روپے 6 پیسے پر بند ہوا۔

بین الاقوامی سطح پر امریکی ڈالر مسلسل تیسرے ہفتے اضافے کی جانب گامزن ہے، کیونکہ واشنگٹن کی اپنے چند تجارتی شراکت داروں کے ساتھ مذاکرات میں پیشرفت کے اشارے اور توقعات سے بہتر معاشی اعدادوشمار نے دنیا کی سب سے بڑی معیشت میں سرمایہ کاری سے متعلق خدشات کو کم کردیا ہے۔

ڈالر امریکی ٹریژریز اور شیئرز نے گزشتہ ماہ کی شدید گراوٹ سے بحالی حاصل کی ہے، جب صدر ڈونلڈ ٹرمپ کی غیر یقینی تجارتی پالیسیوں نے کساد بازاری کے خدشات کو ہوا دی اور امریکی اثاثوں پر سرمایہ کاروں کے اعتماد کو متزلزل کردیا ۔

وال اسٹریٹ میں راتوں رات تیزی دیکھنے میں آئی جس کی وجہ مثبت ٹیکنالوجی کمپنیوں کے منافع جات اور توقعات سے کچھ بہتر صنعتی پیداوار کی رپورٹ تھی اگرچہ رپورٹ نے یہ بھی ظاہر کیا کہ گزشتہ ماہ فیکٹریوں کی سرگرمیوں میں مزید کمی واقع ہوئی۔

اب توجہ دن کے اواخر میں جاری ہونے والے نان فارم پے رولز کے اعداد و شمار پر مرکوز ہے۔

ڈالر انڈیکس ایشیائی مارکیٹ میں ابتدائی کاروبار کے دوران قدرے مستحکم رہا، اور تعطیلات کے باعث نسبتاً ہلکی تجارتی سرگرمیوں کے دوران ہفتہ وار بنیاد پر 0.5 فیصد اضافے کی طرف گامزن ہے۔ امریکی ڈالر 145.53 ین پر ٹریڈ کررہا تھا جو جمعرات کو حاصل کی گئی 3 ہفتوں کی بلند ترین سطح سے کچھ ہی نیچے تھا۔