پاک افغان سرحد، ایک ہی جھڑپ میں 54 عسکریت پسند ہلاک

سیکیورٹی فورسز نے پاک افغان سرحد سے دراندازی کی کوشش کو ناکام بناتے ہوئے ایک ہی جھڑپ میں 54 خوارج دہشت گردوں کو ہلاک کردیا ہے۔ یہ بات عسکری ذرائع ابلاغ کے شعبہ تعلقات عامہ (آئی ایس پی آر) کی جانب سے اتوار کو جاری ایک بیان میں کہی گئی ہے۔

آئی ایس پی آر کے بیان کے مطابق 25 ، 26 اور26 ، 27 اپریل کی درمیانی شب پاک افغان سرحد کے قریب عسکریت پسندوں کی نقل و حرکت کا پتہ چلا۔ سیکیورٹی فورسز نے فوری جوابی کارروائی کی جس کے بعد فائرنگ کا شدید تبادلہ ہوا جو کئی گھنٹوں تک جاری رہا۔

آئی ایس پی آر کے مطابق دہشت گردوں نے شمالی وزیرستان کے علاقے حسن خیل سے دراندازی کی کوشش کی لیکن پاکستانی فورسز کی فوری جوابی کارروائی میں انہیں ناکام بنا دیا گیا۔ آپریشن کے دوران مارے گئے دہشت گردوں کے قبضے سے اسلحہ، گولہ بارود اور دھماکہ خیز مواد کا ایک بڑا ذخیرہ بھی برآمد ہوا ہے۔

آئی ایس پی آر کی جانب سے جاری انٹیلی جنس رپورٹس کے مطابق عسکریت پسند اپنے غیر ملکی ہینڈلرز کی ہدایات پر کام کر رہے تھے اور پاکستان کے اندر بڑے دہشت گرد حملوں کی منصوبہ بندی کر رہے تھے۔

وفاقی وزیر داخلہ محسن نقوی نے آپریشن کو بڑی کامیابی قرار دیتے ہوئے کہا ہے کہ آج ہمارے لیے ایک اہم دن ہے۔ ہماری سیکورٹی فورسز کے پاس دراندازی کی کوشش کے بارے میں بروقت انٹیلی جنس تھی، جس کی وجہ سے انہوں نے تین اطراف سے دہشت گردوں کو گھیرنے اور 54 خوارج کو ہلاک کرنے کی اجازت دی، جو اب تک کسی ایک آپریشن میں ہلاک ہونے والوں کی سب سے زیادہ تعداد ہے۔

انہوں نے مزید انکشاف کیا کہ انٹیلی جنس ایجنسیاں کئی دنوں سے صورتحال پر نظر رکھے ہوئے ہیں، بیرونی عناصر عسکریت پسندوں پر فوری طور پر پاکستان میں دراندازی کرنے اور حملے کرنے کے لئے دباؤ ڈال رہے ہیں۔ ان خطرات کے جواب میں سرحدی نگرانی اور حفاظتی اقدامات میں نمایاں اضافہ کیا گیا ہے۔

صوبہ خیبر پختونخوا میں ہفتہ کے روز3 مختلف کارروائیوں کے دوران 2 جوان شہید اور 15 دہشت گرد مارے گئے تھے۔

آئی ایس پی آر کے مطابق یہ کارروائیاں جمعہ اور ہفتہ کو کرک، شمالی وزیرستان اور جنوبی وزیرستان کے اضلاع میں کی گئیں۔

کرک میں سیکورٹی فورسز نے عسکریت پسندوں کے ایک ٹھکانے کو نشانہ بنایا جس کے نتیجے میں8 دہشت گرد مارے گئے۔

شمالی وزیرستان میں مزید 4 افراد کو ہلاک کیا گیا جبکہ جنوبی وزیرستان کے علاقے گومل زام میں مزید 3 افراد کو ہلاک کیا گیا۔

شہید ہونے والے فوجیوں کی شناخت چارسدہ سے تعلق رکھنے والے 28 سالہ لانس نائیک عثمان مہمند اور کرم سے تعلق رکھنے والے 26 سالہ سپاہی عمران خان کے طور پر کی گئی ہے۔