پاک فوج کے شعبہ تعلقات عامہ (آئی ایس پی آر) کے مطابق سیکورٹی فورسز نے خیبر پختونخوا کے ضلع بنوں میں انٹیلی جنس بیسڈ آپریشن (آئی بی او) کے دوران 6 دہشت گردوں کو ہلاک کردیا ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ علاقے میں عسکریت پسندوں کی موجودگی کی اطلاع ملنے کے بعد 23 اور 24 اپریل کی درمیانی شب آپریشن کیا گیا۔
آئی ایس پی آر کے مطابق سیکورٹی فورسز نے دہشت گردوں کے ٹھکانوں پر فائرنگ کی جس کے نتیجے میں 6 افراد ہلاک اور 4 زخمی ہوگئے۔
بیان میں مزید کہا گیا ہے کہ علاقے میں پائے جانے والے دیگر خوارج کے خاتمے کے لیے صفائی آپریشن کیا جا رہا ہے کیونکہ پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں اور ہمارے بہادر جوانوں کی اس طرح کی قربانیاں ہمارے عزم کو مزید مضبوط کرتی ہیں۔
آئی ایس پی آر کے مطابق رواں ہفتے کے اوائل میں سیکورٹی فورسز نے شمالی اور جنوبی وزیرستان کے اضلاع میں دو مختلف کارروائیوں میں چھ دہشت گردوں کو ہلاک کیا تھا۔
شمالی وزیرستان کے علاقے رزمک میں دہشت گردوں کی مبینہ موجودگی پر کی گئی پہلی کارروائی میں پانچ خوارج مارے گئے۔
سیکورٹی فورسز نے مؤثر طور پراس مقام کو نشانہ بنایا۔ آئی ایس پی آر کے بیان میں کہا گیا ہے کہ اس کے نتیجے میں پانچ خوارج کو جہنم میں بھیج دیا گیا۔
جنوبی وزیرستان میں ایک اور کارروائی میں ایک اہم دہشت گرد کمانڈر ذبیح اللہ عرف زکران مارا گیا۔