وزیر منصوبہ بندی و ترقی احسن اقبال نے پاکستان اور آسیان کے درمیان اسٹریٹجک ٹیکنالوجی شراکت داری پر زور دیا ہے تاکہ جامع خوشحالی کو فروغ دیا جاسکے۔ منگل کو اسلام آباد میں آسیان پاکستان ٹیکنالوجی ایکسپو سے خطاب کرتے ہوئے انہوں نے جدت طرازی پر مبنی مستقبل کی تعمیر کے لئے پاکستان کے عزم کا اعادہ کیا۔
منصوبہ بندی، ترقی اور خصوصی اقدامات کی وزارت کے ایک بیان کے مطابق وزیر منصوبہ بندی احسن اقبال نے اپنے خطاب میں تکنیکی ترقی کی دہری نوعیت پر زور دیا ہے۔
بیان کے مطابق وزیر منصوبہ بندی نے ترقی پذیر خطوں میں بڑھتی ہوئی ٹیکنالوجی کے فرق، ڈیجیٹل تقسیم اور مہارتوں کے عدم توازن سے پیدا ہونے والے خطرات پر روشنی ڈالتے ہوئے کہا کہ خلل پیدا کرنے والے ایجادات عالمی معیشتوں اور معاشروں کو نئی شکل دے رہی ہیں۔
انہوں نے موسمیاتی تبدیلی اور نوجوانوں کی بے روزگاری جیسے مشترکہ چیلنجوں کی نشاندہی کرتے ہوئے ”نوجوان، ٹیکنالوجی سے واقف آبادی اور مضبوط یونیورسٹیوں“ جیسے ہم آہنگی پر روشنی ڈالی۔
احسن اقبال نے تعاون کے لئے تین اسٹریٹجک ستونوں کی تجویز پیش کی ، جس میں تعلیمی شراکت داری کے ذریعے علم کا تبادلہ ، ابھرتے ہوئے شعبوں میں مشترکہ آر اینڈ ڈی پلیٹ فارم اور موسمیاتی تغیرات سے نمٹنے کی صلاحیت اور صحت کی دیکھ بھال کے لئے جامع تکنیکی ترقی شامل ہیں۔
پاکستان کی نیشنل اے آئی پالیسی اور اسپیشل ٹیکنالوجی زونز جیسے پیش رفت کا ذکر کرتے ہوئے احسن اقبال نے اسٹیک ہولڈرز پر زور دیا کہ وہ آسیان پاکستان تعلقات کو نہ صرف تجارت اور سفارت کاری کے روایتی عینک کے ذریعے بلکہ جامع اور پائیدار خوشحالی کے لیے متحرک ٹیکنالوجی اتحاد کے طور پر ازسرنو تصور کریں۔
انہوں نے علاقائی جدت طرازوں کو جوڑنے کے لئے سالانہ آسیان پاکستان ٹیکنالوجی تعاون فورم اور اسٹارٹ اپ برج سمیت ٹھوس اقدامات کا اعلان کیا۔
نسٹ کے عمر خان نے احسن اقبال کی قیادت کو سراہتے ہوئے کہا کہ اُن کی کاوشوں سے 2017–18 میں قومی مرکز برائے مصنوعی ذہانت اور قومی مرکز برائے سائبر سیکیورٹی جیسے اہم تحقیقی مراکز قائم کیے گئے جو آج جدت طرازی کے فعال نظام بن چکے ہیں۔
آخر میں احسن اقبال نے اس بات پر زور دیا کہ مستقبل کی تعمیر تعاون، جدت طرازی اور مشترکہ وژن کے ذریعے ہونی چاہیے۔
ایکسپو کا مقصد ”خطے کے لئے ایک اسمارٹ، سبز اور زیادہ جامع مستقبل“ کو فروغ دینا ہے۔