متحدہ عرب امارات کے وزیر خارجہ شیخ عبداللہ بن زید اہم بات چیت کیلئے آج پاکستان کا دورہ کریں گے
پاکستان کے دفتر خارجہ کے ایک بیان کے مطابق متحدہ عرب امارات کے نائب وزیراعظم اور وزیر خارجہ شیخ عبداللہ بن زید النہیان آج اتوار کو پاکستان کا دو روزہ سرکاری دورہ شروع کریں گے۔
بیان میں کہا گیا ہے کہ یہ اعلیٰ سطحی دورہ پاکستان اور متحدہ عرب امارات کے درمیان گہرے برادرانہ تعلقات کی عکاسی کرتا ہے اور دونوں ممالک کی باہمی دلچسپی کے تمام شعبوں میں دوطرفہ تعاون کو فروغ دینے کے عزم کو اجاگر کرتا ہے۔
اپنے دورے کے دوران، شیخ عبداللہ پاکستان کے وزیر خارجہ اسحاق ڈار سے ملاقات کریں گے۔
ان کی بات چیت دوطرفہ تعلقات کے تمام پہلوؤں پر محیط ہوگی، جن میں خاص طور پر تجارت اور سرمایہ کاری، توانائی کا تعاون، علاقائی سلامتی اور عوامی سطح پر روابط پر توجہ دی جائے گی۔
یہ دورہ دونوں فریقین کو باہمی دلچسپی کے علاقائی اور عالمی امور پر تبادلہ خیال کا موقع بھی فراہم کرے گا۔
یہ ملاقات دونوں رہنماؤں کے درمیان 21 فروری 2025 کو ابو ظہبی میں ہونے والی ملاقات کے بعد ہو رہی ہے۔
شیخ عبداللہ کی وزیر اعظم شہباز شریف سے ملاقات بھی متوقع ہے، جس میں علاقائی امن اور خوشحالی کے لیے مشترکہ وژن کی توثیق کی جائے گی۔
دفتر خارجہ نے کہا کہ یہ دورہ پاکستان اور متحدہ عرب امارات کی دیرینہ شراکت داری کو مزید مستحکم کرے گا اور مختلف شعبوں میں تعاون کو گہرا بنائے گا، جس سے دونوں ممالک کو فائدہ پہنچے گا۔