ٹی پی ایل پراپرٹیز نے اعلان کیا ہے کہ اس نے کورنگی کریک میں پانی کی تلاش کے لئے ٹیسٹ ویل کی کھدائی کے دوران گیس پاکٹ دریافت کیا ہے۔

کمپنی نے پاکستان اسٹاک ایکسچینج (پی ایس ایکس) کو لکھے گئے نوٹس میں کہا ہے کہ ابتدائی تکنیکی جائزوں کے ساتھ ساتھ صنعت کے ماہرین کی جانب سے ظاہر کردہ آزادانہ خیالات کی بنیاد پر یہ اشارہ ملتا ہے کہ یہ گیس کم بائیوجینک میتھین ہو سکتی ہے، جو قدرتی طور پر نامیاتی مادے کے سڑنے کے نتیجے میں پیدا ہونے والی گیس ہے۔

کمپنی کا مزید کہنا تھا کہ چونکہ یہ علاقہ قدرتی گیس کے ذخائر کا حصہ نہیں ہے اس لیے وقت گزرنے کے ساتھ ساتھ گیس کی یہ پاکٹ قدرتی طور پر ختم ہونے کا امکان ہے بشرطیکہ آگ کو جلنے دیا جائے۔

حالیہ ٹیسٹ معروف قومی اور بین الاقوامی مشاورتی اداروں کے تعاون سے کیے جانے والے وسیع مطالعات کے سلسلے کا حصہ تھا - جس میں جیو ٹیکنیکل اسٹڈیز، مٹی کی ساخت اور آلودگی کے ٹیسٹ، الیکٹریکل ریسسٹیویٹی (ای آر) سروے، ایک جامع ماحولیاتی اور سماجی اثرات کی تشخیص (ای ایس آئی اے) اور دیگر بیس لائن مطالعات شامل ہیں۔

یہ بھی مطلع کیا جاتا ہے کہ جمعہ 28 مارچ 2025 کی رات کو یہ واقعہ پیش آنے کے بعد سے ، کمپنی نے صورتحال پر قابو پانے کے لئے تمام ضروری اقدامات اٹھائے ہیں اور متعلقہ اسٹیک ہولڈرز کو مطلع کیا ہے۔