ایزی پیسہ ڈیجیٹل بینک (سابقہ ٹیلی نار مائیکروفنانس بینک لمیٹڈ) کے بورڈ آف ڈائریکٹرز نے اپنے اجلاس میں 31 دسمبر 2024 کو ختم ہونے والے مالی سال کے آڈٹ شدہ مالیاتی نتائج کی منظوری دے دی۔
ایزی پیسہ ڈیجیٹل بینک نے 2024 میں غیر معمولی ترقی کا مظاہرہ کرتے ہوئے پاکستان میں ایک نمایاں ڈیجیٹل مالیاتی سروس فراہم کنندہ کے طور پر اپنی پوزیشن مزید مستحکم کی۔ بینک نے 4.7 ارب روپے کا قبل از ٹیکس منافع (پی بی ٹی) حاصل کیا جو 2023 کے 1.2 ارب روپے کے مقابلے میں 3.8 گنا زیادہ ہے۔ یہ نمایاں ترقی کاروباری حجم اور ماہانہ متحرک صارفین کی تعداد میں اضافے کے ساتھ ساتھ کلاؤڈ سروسز، ٹیکنالوجی اور آپریشنل بہتری میں کی گئی سرمایہ کاری کے ذریعے حاصل کی گئی۔
بینک کی مالی کارکردگی نے اہم اشاریوں میں مضبوط ترقی ظاہر کی۔ آمدنی سالانہ بنیادوں پر 50.8 فیصد بڑھ کر 38.9 ارب روپے تک پہنچ گئی، جس کی بنیادی وجہ خالص مارک اپ آمدنی میں 59.9 فیصد اور نان مارک اپ آمدنی میں 37.6 فیصد اضافہ تھا۔ رجسٹرڈ صارفین کی تعداد 5 کروڑ سے تجاوز کرگئی جبکہ ماہانہ متحرک صارفین کی تعداد 1.61 کروڑ سے زیادہ رہی۔
کاروباری توسیع اور ریگولیٹری تقاضوں کے باعث آپریٹنگ اخراجات میں اضافے کے باوجود، بینک نے مؤثر انداز میں اپنی لاگت سے آمدنی کا تناسب بہتر کرتے ہوئے 2023 کے 93.10 فیصد سے کم کرکے 80.91 فیصد کردیا۔ کسٹمر ڈپازٹس 49.5 فیصد اضافے کے ساتھ 76.2 ارب روپے تک پہنچ گئے جبکہ مضبوط سی اے ایس اے اور سی اے تناسب بالترتیب 99.9 فیصد اور 83.0 فیصد برقرار رہا۔ ایڈوانس بک میں سالانہ بنیادوں پر 53.5 فیصد اضافہ ہوا جس سے مجموعی رقم 28.5 ارب روپے تک پہنچ گئی جبکہ خالص ایڈوانس ٹو ڈپازٹ (اے ڈی آر) تناسب 33.5 فیصد رہا۔ کریڈٹ امپیرمنٹ لاگت 2.5 ارب روپے تک بڑھ گئی، جس کی بنیادی وجوہات آئی ایف آر ایس 9 کا نفاذ اور ڈیجیٹل قرضوں کی ادائیگی میں اضافہ تھیں۔ بینک کا پی اے آر تناسب 14.0 فیصد جب کہ کوریج ریشو 75.7 فیصد رہا۔
بینک کی کارکردگی اور مستقبل کے حوالے سے گفتگو کرتے ہوئے ایزی پیسہ ڈیجیٹل بینک کے صدر اور سی ای او، جہانزیب خان نے کہا کہ ایزی پیسہ ڈیجیٹل بینک اپنی ترقی کے تسلسل کو برقرار رکھنے کیلئے اسٹریٹجک اقدامات کو ترجیح دے گا، خاص طور پر بطور پاکستان کا پہلا ڈیجیٹل بینک صارفین کے اعتماد کو مزید مضبوط بنانے پر توجہ مرکوز کرے گا۔ ان اقدامات میں ڈیجیٹل بینکنگ سروسز کی توسیع، صارفین کے تجربے میں بہتری، اسٹریٹجک شراکت داری اور سرمایہ کاری، ڈیٹا اور اے آئی کے ذریعے ذاتی نوعیت کی خدمات، آپریشنل استعداد میں اضافہ، اور مضبوط ریگولیٹری کمپلائنس و سیکیورٹی کو یقینی بنانا شامل ہیں۔ ایزی پیسہ ڈیجیٹل بینک پاکستان کے ڈیجیٹل مالیاتی شعبے میں اپنی قیادت کو مزید مستحکم کرنے کیلئے پرعزم ہے۔