فروری 2025 ء کے دوران پاکستان میں گاڑیوں کی فروخت 29 فیصد کم ہو کر 12,084 یونٹس رہی۔ پاکستان آٹوموٹو مینوفیکچررز ایسوسی ایشن (پاما) کے اعدادوشمار کے مطابق سالانہ بنیاد پر فروری کی فروخت میں 24 فیصد اضافہ ریکارڈ کیا گیا۔
جنوری 2025ء کے دوران ملک میں گاڑیوں کی فروخت 73 فیصد اضافے کے ساتھ 17 ہزار 10 یونٹس تک پہنچ گئی۔
ٹاپ لائن ریسرچ میں آٹو سیکٹر کی تجزیہ کار میشا سہیل نے کہا کہ فروری کے دوران ماہانہ بنیاد پر کمی بڑی حد تک موسمی تبدیلی کی وجہ سے متوقع تھی، کیونکہ بہت سے خریداروں نے نئے سال میں اپنی گاڑیوں کو رجسٹر کرنے کیلئے دسمبر کی خریداری میں تاخیر کی جس سے جنوری کی فروخت میں اضافہ ہوا۔
ماہانی کمی کے باوجود رواں مالی سال 25 کے پہلے 8 ماہ کے دوران گاڑیوں کی مجموعی فروخت سالانہ بنیاد پر 50 فیصد بڑھ کر 89,770 یونٹس تک پہنچ گئی جو گزشتہ سال کے اسی عرصے میں 59,700 یونٹس تھی۔
میشا سہیل کے مطابق فروری کے دوران کاروں کی فروخت میں سالانہ اضافے کی وجہ شرح سود میں کمی، صارفین کے اعتماد میں بہتری اور نئے ویرینٹس اور ماڈلز متعارف کروانا ہے۔
کمپنی کے لحاظ سے کارکردگی
پاک سوزوکی موٹر کمپنی : جنوری کے دوران آلٹو کی فروخت میں ریکارڈ اضافے کی وجہ سے فروخت میں سالانہ 9 فیصد اضافہ ہوا لیکن ماہانہ بنیاد پر 35 فیصد کمی واقع ہوئی۔
انڈس موٹر کمپنی نے جنوری میں ٹویوٹا ہائی لکس کی غیر معمولی فروخت کے باعث سالانہ 28 فیصد اضافہ ریکارڈ کیا لیکن ماہانہ بنیاد پر 22 فیصد کمی ریکارڈ کی گئی۔
ہونڈا اٹلس کارز (ایچ سی اے آر): ہونڈا اٹلس کار کی فروخت میں سالانہ 35 فیصد اضافہ ہوا لیکن اس میں 7 فیصد کمی واقع ہوئی۔
ہونڈائی نشاط: ہونڈائی کی فروخت میں سالانہ بنیاد پر 35 فیصد اور ماہانہ بنیاد پرایک فیصد اضافہ ریکارڈ کیا گیا، یہ واحد کمپنی ہے جس نے ماہانہ بنیاد پر اضافہ ریکارڈ کیا ہے۔
سازگار انجینئرنگ ورکس : سجگر کاروں کی فروخت سالانہ 2.13 گنا بڑھ گئی لیکن ماہانہ 56 فیصد کم ہوکر 883 یونٹس رہی۔ مالی سال 25 کے 8 ماہ کے دوران اس کی فروخت 7,084 یونٹس رہی جو مالی سال 24 کے 8 ماہ کے 2,667 یونٹس کے مقابلے میں 2.66 گنا زیادہ ہے۔
2 اور 3 پہیوں والی گاڑیاں اور تجارتی گاڑیاں
فروری میں دو اور تین پہیوں والی گاڑیوں کی فروخت میں سالانہ 35 فیصد اضافہ ریکارڈ کیا گیا جو 126،699 یونٹس تک پہنچ گئی، تاہم ماہانہ فروخت میں 9 فیصد کی کمی واقع ہوئی۔
اس میں رائل پرنس موٹر سائیکلوں اور تین پہیوں والی گاڑیوں کو شامل نہیں کیا گیا، جن کے ڈیٹا کا انتظار ہے۔ مالی سال 2025 ء میں اس سیگمنٹ کی مجموعی فروخت 30 فیصد اضافے کے ساتھ 962,315 یونٹس رہی۔
ٹریکٹر انڈسٹری کو مشکلات کا سامنا کرنا پڑا جس کی فروخت سالانہ 54 فیصد اورماہانہ 44 فیصد کم ہو کر 1,534 یونٹس رہ گئی۔ دریں اثنا، ٹرک اور بسوں کی فروخت فروری میں 486 یونٹس تک پہنچ گئی جو سالانہ 38 فیصد اضافہ ہے لیکن ماہانہ 22 فیصد کم ہے۔