پنجاب کے ایمرجنسی سروسز ڈپارٹمنٹ (ای ایس ڈی) نے فروری 2025 کے دوران ٹریفک حادثات میں 375 اموات کی اطلاع دی ہے جس سے صوبے بھر میں حادثات میں تشویشناک اضافے کی نشاندہی ہوتی ہے۔
ان اعداد و شمار کا انکشاف سیکرٹری ای ایس ڈی ڈاکٹر رضوان نصیر نے محکمہ کی ماہانہ آپریشنل کارکردگی کا جائزہ لیتے ہوئے کیا۔ انہوں نے ہنگامی صورتحال میں اضافے پر گہری تشویش کا اظہار کیا ہے۔
اعداد و شمار کے مطابق ریسکیو 1122 نے گزشتہ ماہ پنجاب بھر میں ایک لاکھ 80 ہزار 807 ہنگامی صورتحال کا مقابلہ کیا اور ایک لاکھ 83 ہزار 455 متاثرین کو بچایا۔
ان میں سے 37,390 ٹریفک حادثات ہوئے جو ریکارڈ 35.58 فیصد اضافہ ہے۔
ڈاکٹر رضوان نصیر نے اس بات پر زور دیا کہ حادثات میں اضافہ تشویشناک ہے، فروری 2021 میں ماہانہ سڑک حادثات کے واقعات 27,578 سے بڑھ کر فروری 2025 میں 37،390 ہو گئے ہیں۔
صوبائی دارالحکومت لاہور میں سب سے زیادہ ٹریفک حادثات رپورٹ ہوئے جہاں 6 ہزار 839 واقعات ہوئے جن کے نتیجے میں 34 افراد جاں بحق ہوئے۔
فیصل آباد، ملتان، گجرانوالہ، شیخوپورہ اور راولپنڈی سمیت دیگر بڑے شہروں میں بھی حادثات کی بڑی تعداد ریکارڈ کی گئی۔
اسی عرصے کے دوران سڑک حادثات کے علاوہ صوبے میں آگ لگنے کے 2135 ہنگامی حالات، 448 بجلی کے جھٹکے، 41 ڈھانچے گرنے اور ڈوبنے کے 30 واقعات پیش آئے۔
ڈاکٹر رضوان نصیر نے ڈویژنل اور ڈسٹرکٹ ایمرجنسی افسران کی موجودگی میں ایک جائزہ اجلاس کی صدارت کرتے ہوئے شہریوں پر زور دیا کہ وہ ڈرائیونگ کے محفوظ طریقوں کو اپنائیں۔
انہوں نے موٹر سائیکل سواروں کو 50 کلومیٹر فی گھنٹہ سے زیادہ رفتار سے گریز کرنے کا مشورہ دیتے ہوئے کہا کہ ہر ایک کلومیٹر فی گھنٹہ کی رفتار میں اضافے سے مہلک حادثات کا خطرہ 4 سے 5 فیصد تک بڑھ جاتا ہے۔
انہوں نے حفاظت کو فروغ دینے اور ہنگامی صورتحال کی روک تھام کے لئے اجتماعی کوششوں پر بھی زور دیا۔
اجلاس میں طبی ہنگامی صورتحال، جرائم کے واقعات اور جانوروں کو بچانے کے حوالے سے محکمہ کی کاوشوں پر بھی روشنی ڈالی گئی اور ریسکیو 1122 کے آپریشنز کے وسیع دائرہ کار کو اجاگر کیا گیا۔
ان چیلنجز کے باوجود محکمہ زندگیاں بچانے اور پنجاب بھر میں ہنگامی صورتحال کو کم کرنے کے لیے پرعزم ہے۔