ٓپاکستان میں چاند نظر نہیں آیا، پہلا روزہ 2 مارچ کو ہوگا

مرکزی رویت ہلال کمیٹی کے اجلاس میں تصدیق کی گئی ہے کہ پاکستان میں رمضان المبارک کا چاند نظر نہیں آیا اور پہلا رمضان 2 مارچ 2025 کو ہوگا۔

کمیٹی کے چیئرمین مولانا سید محمد عبدالخبیر آزاد نے ایک پریس کانفرنس میں اس بات کی تصدیق کی ہے۔

اسلام آباد میں وزارت مذہبی امور و بین المذاہب ہم آہنگی میں کمیٹی کے متفقہ فیصلے کا اعلان کرتے ہوئے مولانا عبدالکبیر آزاد نے کہا کہ پہلا رمضان اتوار 2 مارچ 2025 کو ہوگا۔

انہوں نے کہا کہ رمضان المبارک کا چاند دیکھنے کے لئے زونل رویت ہلال کمیٹیوں کے بھی اپنے متعلقہ ہیڈ کوارٹرز میں الگ الگ اجلاس ہوئے۔

دریں اثنا پاکستان اسپیس اینڈ اپر ایٹموسفیئر ریسرچ کمیشن (سپارکو) نے پیش گوئی کی ہے کہ پاکستان میں اس سال رمضان کا مہینہ اتوار 2 مارچ سے شروع ہوگا۔

پیر کے روز ایک رپورٹ میں سپارکو نے کہا کہ پاکستان میں عید الفطر کا پہلا دن 31 مارچ 2025 کو ہونے کا امکان ہے۔

ترجمان سپارکو کا کہنا تھا کہ نیا چاند 28 فروری کو پاکستانی وقت کے مطابق صبح 5 بجکر 45 منٹ پر پیدا ہوگا اور اسی دن غروب آفتاب کے وقت چاند کی عمر 12 گھنٹے ہوگی جب کہ 28 فروری کو کم بلندی اور فاصلے کی وجہ سے چاند نظر آنا مشکل ہوگا۔

ترجمان سپارکو کا مزید کہنا تھا کہ شوال کا چاند 30 مارچ کو متوقع ہے اور عیدالفطر 31 مارچ کو ہوسکتی ہے۔